Ferrari-in Sebastian Vettel an hnawl!
Formula 1 season thar chu hun rei tak chhung an ṭan theih loh hnuah Pathianni tlai dar 6:40 hian an tlan dawn ta. Inelna an neih hmain Ferrari leh Sebastian Vettel inkar chhia a puakkeh a, German driver hi hnawl a ni.
March thla khan Australian Grand Prix tlan an tum a, team tam zawk chuan Melboure khawpui an lut tawh. Mahse McLaren team member pakhat chuan Covid-19 a kai tih an hmu chhuak. Thla thum chuang an chawlh hnuah Red Bull Ring-ah Austrian Grand Prix hmangin inelna an ṭan ang.
Inelna pariat
Formula 1 thuneitu lam chuan 2020 season-ah hian harsatna lian tak thleng mah se inelna a tam thei ang ber neih an tum. A hmasa atan Europe khawmualpuiah inelna pariat neih turin an ruahman, inelna dang chu a ram dinhmuna zira ngaihtuah ṭhat tur a ni.
World championship pangngai nei tur chuan a tlem berah intlansiak pariat tal a awm a ngai. Europe ami hi an tlan kim thei a nih chuan, kawmualpui dangah tlan thei lo ta pawh ni se driver leh team champion an awm thei tho ang.
Australia, Monaco, France, Netherlands, Azerbaijan, Singapore leh Japan an ṭhulh tawh. September-November chhungin Eurasia (Russia), Asia (Vietnam leh China) bakah Americas (Canada, US, Mexico, Brazil) neih an beisei. December hian Middle East (Bahrain leh Abu Dhabi) te pawh tlan theih an la inring ve bawk.
Vettel hun hnuhnung
Red Bull car a khalh laiin Vettel-a'n F1 inelna a thunun a, world champion vawi li a ni thei. Team hlun leh ropui zawk Ferrari-in an lalut a, mahse car sen (red) khalh chungin tun hma lama a ropuina ang kha a nei let leh theih tawh lo - a la champion leh lo a ni.
German tlangval hian Ferrari tan tun season daih bak hi contract an nei tawh lo, kumin tir lam khan an pawtsei dawn lo tih pawh an ti chiang tawh. Vettel chuan, "Team boss Mattia Binotto-a'n phone hmangin thawhhona pawhsei an tum loh thu min hrilh, ṭha taka sawihona a awm lo.
"Contract ṭha zawk emaw, a pangngai ang emaw pawh zawrh ka ni lo," tiin Italian team nen an inkar chungchang a sawi. Tun season chhung chu Charles Leclerc nen Ferrari car an khalh dun dawn a, tu zawk nge 'number 1 driver' ni zawk dawn hriat thiam a har.
Hamilton leh record
Michael Schumacher-a'n Formula 1 title vawi sarih zet a lak khan tuma chuh buai phak loh leh tluk ngai loh tura ngaih a ni. Mahse, tunah chuan German legend record hi him takin a awm ta bik lo - kuminah Lewis Hamilton a champion leh a nih chuan a nihrual tawh dawn.
Mercedes driver Hamilton hian amah hnaih bertu Vettel a nek chhuak thei a, kuminah pawh boruak a danglam viau a nih loh chuan a chungnung leh thei turah an ngai. Chutih rualin Ferrari driver chhuak thar Leclerc leh Red Bull duhlai Max Verstappen te pawh elpui hautak an ni ang.
Team champion lai Mercedes hi tun hma aṭangin an car rawng chu 'silver' a ni. Tun season-ah erawh car dum (black) an khalh dawn. Car rawng an thlak chhan hi chi leh chi inthliarna an duh loh zia lantirna a ni a, a nihna takah chuan mihang an thlawpna a ni ber.
F1 2020 Season Calendar (Tih chian chin)
Round Hun Inelna Hmun
1 July 5 Austrian Grand Prix Spielberg
2 July 12 Styrian Grand Prix Spielberg
3 July 19 Hungarian Grand Prix Budapest
4 August 2 British Grand Prix Silverstone
5 August 9 70th Anniversary Grand Prix Silverstone
6 August 16 Spanish Grand Prix Barcelona
7 August 30 Belgian Grand Prix Spa-Francorchamps
8 September 6 Italian Grand Prix Monza