Djokovic leh a nupui an fihlim

Tennis mipa world number 1 Novak Djokovic leh a nupui Jelena te chu Covid-19 lakah an fihlim ta, hripui an kai aṭanga ni kua a liam hnuah an dam thu hi Serbian tlangval team chuan an puang.

Adria Tour khel zinga mi Djokovic bakah player dang - Grigor Dimitrov, Borna Coric leh Viktor Troicki te pawhin coronavirus hi an kai a, natna lang chhuak nasa leh ngaihtuahawm erawh an awm lem lo a ni.

Djokovic-a team chuan thu chhuah siamin, "Novak Djokovic leh a nupui Jelena te chu Belgrade-ah an dinhmun endik leh a ni a, endikna neih hnuhnung berah chuan hri an kai tawh lo. Natna nei lo mah se doctor-te thurawn angin endikna hi neih a ni," an ti.

Grand Slam vawi 17 champion tawh Djokovic-a'n inelna a buatsaih avangin sawisel a hlawh a, mahse Serbia-ah chuan hri leng a tam loh bakah inkharkhipna kalpui a nih ve lem loh avangin an ram dan bawhchhiat a nei lo.