Asian Games medal dawng tur Siami ; Zaninah Gold Medal Match

"Asian Games champion nih tumin theihtawp kan chhuah dawn a, a bak chu Pathian kutah a awm," tiin Lalremsiami Hmar chuan Vanglani a hrilh - Mizo nula hockey khel thiam Siami telna India hian zanin dar 6:30 hian Japan nen Gold Medal an inchuh zui dawn.

Nilaini zan khan semifinal-ah India hian China 1-0 a hnehin final an lut, 1998 hnua a vawi khat nan final an khel leh dawn. Kolasib nula Siami hian a chhe berah silver medal tal a dawng tawh dawn; Mizo infiammi zingah Asian Games-a medal hlawh chhuak hmasa ber a ni ta.

Asian Games-ah hian 1982 aṭangin hmeichhe hockey telh a ni a, India an champion. Mahse, hemi hnuah gold medal an la vaw chhuak leh lo, kum 36 hnuah champion leh an tum dawn. Final-a an hmachhawn tur Japan hian semifinal inkhel lehlamah vawi nga champion tawh South Korea chu 2-0 in an hneh.

Goal khat a tawk
Pool B hmahruaitu India-in an pool match hoah ngam loh an tawng lo a, harsatna nei loin semifinal an thleng. An khingpui China erawh Pool A lama pahnihna niin, an chungah Japan an awm thung.

Chak tura rinkai zawk India-in inkhel thunun viau mah se goal an hlawh chhuak mai thei bik lo, quarter li khelh tur zinga a hmasa pathumah goal an nei thei lo. Goal lut loin hun a tawp mai dawna a lan hnuin India lamin penalty corner an hmu leh, Gurjit Kaur chuan goal pawimawh leh awmchhun khung nan a hmang.

Match hmasa lam angin India an vannei tawk lo, hattrick siam tawh pahnih captain Rani Rampal leh Siami te pawhin hun ṭha nei mah se an vannei tawk lo a, ṭum dang zawng aiin China goalkeeper a che ṭha ve bawk.

India coach Sjoerd Marijne chuan, "Ka naute hian hetiang hun thleng tur hian thi harsa tam tak an paltlang a, hetiang dinhmun an thleng thei hi ka lawm. First half-ah khan an khel ṭha tawk lo a, a hnu lamah erawh hma an sawn," tiin a sawi a, final-a an khingpui tur Japan chu team ṭha tak ni mah se chak an beisei thu a sawi tel bawk.

Rinkai India
India nulate hi world ranking-ah pakuana ni lai an ni a, tun inlan bikah hian ranking sang ber an nih avangin champion tura rinkai pawh an ni. Anmahni hnaih bertu South Korea chu pool match-ah 4-1 in an hneh a, final-a an hmachhawn tur Japan hi 14-na ni lai an ni.

Asian Games neih laiah India nulaten match nga an khelh tawh chinah goal 39 tehmeuh an khung tawh a, an mahni lamah goal khat chiah a la lut - South Korea nen an inkhelh ṭum chauhin goal an chhuah. Match an khelh tawh zawng zawngah hian Thenzawl Hockey Training Centre aṭanga zir chhuak Siami a inlan kim a, player pawimawh a ni vek.

Hmeichhe team an chet ṭhat ang thoin mipa lam pawh an duai lo. India tlangval ten pool match bikah ringawt goal 76 an khung tling thei a, 2004-a Argentina record siam (68 goals) chu khumin group stage bika goal khung hnem ber an ni. India hian semifinal-ah Malaysia an hmachhawn leh dawn a, Inrinni zanah a hmawr bawkna neih tur a ni ang.