Zaninah MPL7 KickOff

Mc Dowell's No. 1 Soda Mizoram Premier League Season 7 KickOff chu zanin dar 7:00 hian Chanmari YMA Hall-ah Sports & Youth Services minister Zodintluanga'n a kickoff dawn.

Football hunpui lian hi Zonet HD leh Rihnim-ah live-a pekchhuah tur a ni.

Zanin kickoff-ah hian handbook tlangzarhna, oath taking, tie draw leh jersey pholanna te a awm dawn. Football hruaitu, football player, sawm bik leh sponsor-te an pungkhawm ang.

Inelna chu

Mizorama tualchhung football inelna sang berah hian champion lai chu Chhinga Veng FC an ni a, anni bakah hian I League club Aizawl FC, Mizoram Police, Chanmari FC, Ramhlun North, Bethlehem Venghtlang, Chawnpui FC leh Eletric Veng FC te an inel dawn.

MPL7 hi September 6 hian Lammualah khelh ṭan a ni ang a, league round-ah hian club pariatte hi vawi khat ṭheuh an inkhel chhuak ang. Hemi aṭanga a sang palite hi semifinal an lut ang a, a hniam pahnihin relegation playoff an khel thung dawn.

Tie Draw

MPL6 fixtures hi zaninah a hriat chauh dawn a, tie draw hi Johny Hmar-in a kaihruai ang.

Fixtures hi MPL club pariat aiawhin hmeichhe pariat Zonuni Fanai (AMC Councellor & TV Host), Feli Fanai (Zaithiam), Rody H Vanlalhriatpuii (Miss Mizoram 2017), T. Ramthanmawii (Miss Mizoram 2018), Esther Vanlalnunpuii Sailo (Miss Mizoram 2017 Runner up), Baryl Vanneihsangi (TV host & RJ), Sarah Lalnunsangi (TV host) leh Mimi Tlau (Miss Physique 2018) ten an pawt ang.

Nikum khan MPL hi Lungleiah round khat khelh a ni a, MPL5 khan Champhaiah khelh a ni tawh bawk. Tun season-ah pawh Aizawl pawna khelh leh turin ruahhmanna siam a ni a, Kolasib leh Serchhip-ah te round khat ve ve khelh a ni ang.

Kickoff-tu Sports Minister

MPL Kickoff hmasa ber hi kum 2012 khan India ram footballer zinga hming dai tawh lo tur Bhaichung Bhutia-a'n hawnna a nei a. Sikkimese Sniper tiha hming lem an vuah Bhaichung-a'n MPL Kickoff a neih hnuah hian Lal Thanzara (MPL2, MPL4), Larsing Ming (MPL5) leh Chirag Tanna (MPL6) bakah grassroots hmeichhia leh mipa naupang ten (MPL3) MPL kickoff hi an nei tawh.

Kumin hian kickoff tu Mizoram sports minister Zodintluanga a ni a, ani hnuaiah hian sports infrastructure-ah Mizoramin nasa takin hma a sawn a ni.

Zanin Programme
Host Marilyn Khawlhring
Welcome Speech Lal Thanzara, MFA President
Handbook Release PC Vanlalhruaia, MPL Board Chairman
Oathtaking S. Malsawmtluanga
Zai Ruth VL Muanpuii
MPL 7 Preview Lalnghinglova Hmar, MFA Hon Secy
Tie-Draw Johny Hmar
Jersey Display Models
Zai Rachel Lalnunkimi
Kickoff & Thusawi Zodintluanga, Sports Minister

Season Kick Off-tu Nihna
MPL1 Bhaichung Bhutia Indian Football Legend
MPL2 Lal Thanzara MFA President
MPL3 Grassroots hmeichhia leh mipa naupang
MPL4 Lal Thanzara MFA President
MPL5 Larsing Ming AIFF Vice President
MPL6 Chirag Tanna General manager, Reliance Sports
MPL7 Zodintluanga Mizoram Sports Minister