Sane-a'n kum 5 daih contract ziak

Leroy Sane-a'n Germany club ṭha ber Bayern Munich a zawm ta a, kum nga daih contract a ziak. Bavarians hian Sane manah hian Manchester City hnenah pound maktaduai 44.7 an pe phawt ang a, a chet ṭhat dan a zirin a man hi pound maktaduai 54.8-ah a pung chho thei ang.

Kum 24 mi Germany winger hian kum 2016 khan Schalke aṭangin pound maktaduai 37-in Manchester City hi a zawm a, Premier League leh League Cup pahnih ve ve a lakpui bakah FA Cup-ah a champion pui bawk.

Sane chuan, "Bayern hi club lian tak leh hmathlir thui tak nei an ni a. Bayern nen hian nomawi tam tak chawi ka duh a, Champions League chu kan ngaih pawimawh ber tur a ni," tiin a sawi. Bavarians hian kum 2013-a Jupp Heynckes hoa UCL nomawi an chawi hnuah an la champion leh lo.

Bayern chief executive Karl-Heinz Rummenigge chuan, "Kan thil tum chu Bayern-a German player ṭha ber ber lakluh hi a ni a, Leroy kan lakluh hi kan thil tum tihlawhtlinna pakhat a ni," tiin a sawi.Sane hi Germany tan vawi 21 a khel tawh a, Bayern tan hian Champions League khelh hma bakah inlan thei lo mah se karleh aṭangin team zingah training a nei ang.