Williams unau intawng dawn

Hun rei tak chhung hmeichhe tennis thunun tawh Venus leh Serena Williams te chu US Open third round-ah an intawng dawn a, American unau hi tennis an khelh hun chhungin vawi 30 an intawnna tur chiah a ni.

US Open vawi ruk champion tawh Serena hian nimin zing khan world number 101 Carina Witthoft chu 6-2, 6-2 a hnehin second round a paltlang, inkhel dangah Venus pawhin Camila Giorgi chu 6-4, 7-5 in a hneh ve bawk - Williams unau hi vawiinah an inkhel dawn a, he thu buatsaih lai hian a dar zat a la hriat theih loh.

American unau hi Grand Slam bika an intawn hnuhnung ber chu Australian Open 2017 kha a ni a, chawlhkar riata upa fa pai chungin Serena a chak - major title 23 zet la tawh Serena hian a hnu lamah nomawi lian a la chawi leh lo, ropuina chang leh tur chuan a u a hneh a ngai dawn.

Hmeichhe singles inkhel dangah champion lai Sloane Stephens chuan world number 134 Anhelina Kalinina lakah set hmasa hloh mah se, darkar hnih leh minute 46 chhungin 4-6, 7-5, 6-2 in hnehna a chang.

Player langsar dang Victoria Azarenka, Elina Svitolina leh Karolina Pliskova ten hnehna an chang a, hetihlai hian Wimbledon champion tawh Garbine Muguruza erawh Karolina Muchova lakah 3-6, 6-4, 6-4 in a chak lo thung.