India tana gold latu Barman

Ke zungṭang 12 nei chungin piang mah se a nih tum dal turin a lian tawk lo, Indian infiammi zingah Swapna Barman chu heptathlon huanga Asian Games gold medal la thei hmasa ber a ni.

Heptathlon hi inelna hautak tak a ni a, ni hnih chhung inelna neih a ni. A ni hmasa zawkah 100m hurdles, high jump, shot put leh 200m hmangin inelna an nei a, Nilaini khan long jump, javelin leh 800m hmangin an inel chhunzawm - gold dawng tur hian a belhkawmah point 6026 hmuin Asian ram chhungah amah tluk an awm lo.

Kum 21 mi Barman hi rickshaw khalhtu Panchanan Barman fanu a ni a, pianphunga rual a ban loh bakah chhungkaw harsatna avangin a nun bul lamah chuan buaina a nei ṭhin. Mahse, a theihna sang tak thup theih a ni lo, cricketer chawl tawh Rahul Dravid chuan tun dinhmun a thlen theih nan hian a sponsor a, sorkar aṭangin scholarship a dawng bawk.

Gold a dawn hnuah Barman chuan, "Mi pangngai pheikhawk ka bun thei ve lo a, training-na hmuna kan bun ṭhin pawhin ka ke a tih nat avangin a hnuaia hling nei chi phei chu ngaihtuah ngam a ni lo," tiin a hun tawn harsat zia a sawi.

Nikum Asian Championship-ah khan Barman-i'n gold medal a dawng tawh, mahse a ke rek leh hnungzâng na avangin kum khat deuh thaw a buai. Amaherawhchu, Asian Games qualifier neih dawnah a dam a, India aiawh tur thlannaah pahnihna niin Asiad-ah a inlan theih phah a ni.

Asian Games
2018 Ṭ Medal Table (Top 15)
# Ram Gold Silver Bronze Total
1 China 106 68 50 224
2 Japan 53 47 64 164
3 South Korea 37 43 53 133
4 Indonesia 30 22 37 89
5 Iran 19 17 19 55
6 Uzbekistan 13 18 18 49
7 Chinese Taipei 13 17 21 51
8 North Korea 12 8 11 31
9 India 11 20 23 54
10 Thailand 9 13 36 58
11 Kazakhstan 9 11 34 54
12 Bahrain 9 3 6 18
13 Vietnam 4 15 13 32
14 Hong Kong 4 12 17 33
15 Malaysia 4 11 9 24
Note: Table hi nimin tlai thlenga an dinhmun a ni a, inelna hi neih chhunzawm zel a nih avangin an dinhmun hi a danglam leh thei.