Nadal hlim niah Murray a tlu

Champion lai Rafael Nadal-a'n harsatna nei loin US Open third round a lut a, world number 1 hlui Andy Murray erawh khaw lum hnuaiah a inkhel ṭha thei lo - Britain tlangval hi Fernando Verdasco hneh loin a zin kawng a tawp.

Grand Slam vawi thum champion tawh Murray hian kum khat leh thla hnih hnuah major tournament a khel leh chauh a ni a, match hmasa berah hnehna chang mah se a vannei nawn lo. Seeded 31-na Verdasco lakah hian 7-5, 2-6, 6-4, 6-4 in a tlawm. British number one Kyle Edmund chu first round-ah a tla nghal a, second round-ah hian Cameron Norrie a chak loh ve bawk avangin singles huangah British player dam an awm tawh lo.

Dal theih loh Nadal

World number 1 Nadal-a'n nimin zing khan seeded chang phak lo Vasek Pospisil hneh turin buaina a nei lo, darkar hnih chhungin Canadian tlangval hi 6-3, 6-4, 6-2 in a hneh. Grand Slam vawi 17 champion tawh Nadal hian third round-ah chuan Karen Khachanov a hmachhawn leh ang.

Spanish player Nadal-a'n round hmasak zawkah a hnampui David Ferrer chu awlsam takin a hneh tawh a, set thum chhung leka Pospisil a hneh leh thei hi atan thil ṭha a ni. Ṭum danga a khelh angin baseline aṭangin forehand ṭha tak tak a nei a, a ball vuak a nat bakah sir zet zeta a vuak phei theih avangin dan theih a ni lo.

Kum 32 mi Nadal hian forehand bikah unforced errors vawi li chiah a nei! Kum 22 mi Khachanov-a'n theih tawpin bei ṭhin mah se a khingpui lamin a tihsual duh miau loh avangin hun pawimawh laiah tawnhriat nei ṭha zawk a dingchang zel.

New York-ah khua a lum hle a, player ṭhenkhat phei chuan harsatna an tawk. Nadal chuan, "Set hloh loa chak theih hi duhthusam a ni, a bik takin tun ang boruakah chuan inkhelh rei loh hi a ṭha. A nihna takah chuan hetianga khaw lum hnuaia inkhelh hi player bakah fans tan pawh a nuam lo," tiin a sawi. US khawpuiah hian kaw lum lam hi 38C te a thleng.

Mangṭha Murray

January thla khan Murray khel bawr na zai a ni a, an zai hnuah tournament pali a khel leh tawh. Mahse, tun hma angin a la khel ṭha leh tawk lo a, nomawi a la chawi leh thei lo.

Nilaini zan inkhelah kum 31 mi Murray hi darkar thum leh minute 23 chhungin a chak lo zawkah a ṭang. Boruak a lum a, khaw lum piah lamah boruak a hnawng hle bawk - hun harsa taka an intawn tawhnaah kum 34 mi Verdasco a dingchang zawk.

Murray hi world number 382 a ni mek, seeded chang phak lo mah se round hmasa lamah player langsar a tawng lo. Match hmasa zawka a hneh kha world number 448 James Duckworth a ni a, tun ṭuma a hneh loh hi US Open quarterfinal vawi hnih khel tawh Verdasco a ni thung.

A chak loh hnuah Murray chuan, "A changin ka khel ṭha a, ball ka vuak dan ṭhenkhat erawh kha chu kei ngei pawhin a ngaihna ka hre lo ṭhin. A bik takin set hmasa berah khan tihsual ka ngah hle, ka tawpna tur erawh a la ni lo," tiin a dam a nih chuan nakkumah US Open khelh leh a la tum.

Del Potro a tlang

Flushing Meadows, New York-ah engtik lai mahin Juan Martin del Potro hian boruak a nei sang lo ngai lo. Argentine tlangval hian third round lut turin Denis Kudla chu darkar khat leh minute 56 chhungin 6-3, 6-1, 7-6 (7-4) in a hneh.

US Open 2009-ah Del Potro hian nomawi a chawi a, hemi kum hian Nadal leh Roger Federer a paltlang. Hard court inelna lianah hian mipui ṭan a hlawh a, second round a khel pawh fans lamin an au phur nasa hle - match lehpekah Fernando Verdasco a hmachhawn ang.

Inkhel dangah champion tawh dang Stan Wawrinka chuan French player Ugo Humbert chu 7-6 (7-5), 4-6, 6-3, 7-5 in a hneh. 2016 US Open champion hi nikum khan a khup hliam zai a ni a, ani pawh hi Murray angin dam tawh mah se nomawi chawi phak khawpin a la khel chhuak bik lo; third round luh hi a tan result ṭha a ni.

Wimbledon finalist Kevin Anderson pawhin Jeremy Chardy 6-2, 6-4, 6-4 in a hneh a, nikuma final a khelh tawhna a nih avangin South African star hi a mikhual lo. Seeded pakuana Dominic Thiem chuan inkhel inhnehtawk takah Steve Johnson chu 6-7 (5-7), 6-3, 5-7, 6-4, 6-1 in a hneh ve bawk.