Mizoram Police champion kum?

Mizoram Police vanglai pel tawh anga sawi chu Mizoram Premier League Season 7-ah an rawn par chho leh dawn niin a lang. Coach Lalbiaksanga Colney hnuaia chona thar a hmachhawn tur hi tualchhung football ngainatute hmuh chak a ni.

Kum 6 liam ta

Police-in tualchhung football inelna sang china an nomawi chawi hnuhnun ber chu Mizoram Premier League ṭan hma daih tawh kha a ni a, MPL ṭan hma inelna hnuhnung ber I Day Football-ah an champion.

MPL hmasa berah pawh champion rinkai ni mah se season chhawhnu lamah an chesual a, Dinthar FC-in an lehthal. Hemi hnu hian Police hi an tho chhuak tawh lo a, MPL4-ah phei chuan an player pawimawh F. Lalrinpuia leh Lalbiakhlua te Aizawl FC hnenah an hawhtir avangin an relegate hial.

First division-ah champion nichungin MPL-ah Police an kir a, season liam ta bul ṭan ṭha lo mah se tuna an coach BS-a Colney hoin a tawp an khar ṭha. Tla thei dinhmun aṭangin semifinal hial an thleng a, Mizoram Police hian final khel tur zawnnaah Aizawl FC an hneh lo.

Insiam tharna

Mizoram Police-in tun hnaia result an neih ṭhat lohna hi recruitment an neih khat vang a ni a, tun season-ah erawh tun hnaia recruiment an neih avangin an ṭha dawn.

Police hian tualchhung player ṭha zawng zawng deuh thaw an hui khawm a tih theih a, chung zingah chuan Mizoram keeper ṭha bera chhal ngam F. Lalmuanawma, midfielder ṭha R. Malsawmtluanga leh forward ṭha Malsawmfela te an tel.

Amaherawhchu, Police hian an player tharte hi training an neih avangin season ṭantirh lamah an chhawr thei dawn lo a, season chawhnu lamah erawh an hman theih a rinawm. BS-a Colney hian MPL khel tura player 35 a neih te a hman theih tura an awm kimah chuan tualchhung player neih ṭha ber tiin an sawi theih tawh ang.

Champion tum

Police coach BS-a Colney chuan, "Semifinal-a tlak hi a khamawm tawh alawm. MPL7-ah chuan champion ngei kan tum ang," tiin a sawi.

Mizoram Police hian MFA Super Cup leh I Day Football-ah semifinal an thleng ve ve a, inelna pahniha champion Chhinga Veng leh I League club Aizawl FC te an hneh lo. MPL-ah pawh club ṭha pahnih bawk hi an elpui tur an nih dawn avangin MPL champion tur chuan insiamṭhatna tur a la tam hle.