Dempsey a chawl ta

Tottenham leh Fulham forward hlui Clint Dempsey chuan season 15 chhung a chamchilh tawh professional football chu a chawlhsan thu a puang ta, United States international hlui hi kum 35 mi a ni.

Dempsey hian Fulham tan inelna hrang hrangah goal 50 a khung a, hei hi club record a ni. Premier League-ah pawh Spurs leh Fulham tana a khelh laiin goal 57 a khung hman - American player zingah ani aia EPL goal khung hnem an awm chuang lo.

New England Revolution aṭanga football nun bul ṭantu Dempsey chuan, "Professional player nih hi ka thil tum ṭhin a ni a, ka duh ang ka ni thei hi ka lawm hle. New England Revolution, Fulham, Tottenham leh Seattle Sounders bakah US tana ka khelh laia min ṭantute chungah lawmthu ka sawi," a ti.

Craven Cottage-a hun a hman laiin Dempsey hian 2010 Europa League final a khel a, champion zo lo mah se American player zingah European football inelna liana final khel thei hmasa ber a ni.

Ram tan match 141 a khel a, World Cup pathum 2006, 2010 leh 2014 te khan goal a khung vek a, he a sulhnu pawh hi an ram record tho a ni.