Benfica-in Champions League khel dawn

Portuguese club ṭha Benfica chuan season tharah Champions League an khel dawn - Nilaini zan khan Champions League playoff second leg-ah PAOK Salonika chu 4-1 in an sawp a, inkhel hmasa zawkah 1-1 a an lo inhnehtawk tawh bawk avangin Champions League group stage khel turin an tling.

PSV Eindhoven-in Cham­pions League khel tura inpetkai turin harsatna an tawk lo a, BATE Borisov chu 3-0 in an sawp a, inkhel pahnih belh­khawmah 6-2 in hnehna an chang - Dutch club ve tho Ajax hnungzuiin Europe-a club inelna sang berah an inlan dawn tihna a ni.

Hetihlai hian Nilaini zana playoff ngaihven hlawh lo bera chhal ngamah inkhel hmuhnawm phochhuahin a awm a, Red Star Belgrade chuan comeback ropui lantirin 2-0 a an tlawm hnuah Red Bull Salzburg chu 2-2 in an inhnehtawkpui a, away goal rule hmangin an tlang daih!

Champions League playoff khelh zawh a nih avangin season thara Europe club ṭha inelna sang bera inlan tur club 32 a chiang fel tawh a, nizan khan draw neih niin he thu buatsaih lai hian result kan hre hman lo.

Benfica chu le...

Portuguese club lar hi foot­ball ngaina zingah chuan hriat an hlawh hle. Playoff-ah PAOK nen an inhmachhawn dawn tih hriat a nih pawh khan Greece club lakah awlsam taka chak tura beisei an ni - rin ang erawh a ni lo.

Portugal-ah Benfica hian 1-1 in an inhnehtawkpui a, away goal hlu tak nen PAOK an haw tir. Hei vang hian Greece-ah pawh chak tur zawk rinthiam a harsa - mahse, Nilaini zanah thawnthu a danglam tawh.

Minute 13-na lekah Aleksan­dar Prijovic chuan Greek club tan goal hmahruai khung mah se Benfica-in goal liin an chhanglet - Eduardo Salvio chuan penalty hmangin goal hnih a khung a, Jardel leh Pizzi ten goal khat ve ve an thawh bawk.

Minute 76-naah POAK de­fender Leo Matos chu hnawh­chhuah a ni bawk a, kum 32 mi hnawhchhuah a nih hma hian Benfica hian goal li an khung fel der tawh.

MvB leh PSV!

Mizo football ngainatu zingah Mark van Bommel 'hmel' la mitthla thei an awm nualin a rinawm - Barcelona, Bayern Munich leh AC Milan tana defensive midfielder hna thawk ṭhin hi tunah chuan kum 41 mi a ni tawh a, PSV coach a ni bawk.

Netherlands international hlui hi June-ah khan Dutch club enkawl tur hian lakluh a ni a, Champions League a khelhpui nghal dawn - khualmuala 3-2 a an lo hneh tawh hnu BATE Borisov an mikhual a, 3-0 ngawtin an lo sawp.

PSV tan hian Steven Ber­gwijn, Luuk de Jong leh Mexi­co international Hirving Lozano te chuan goal khat ṭheuh an khung a, Belarusian club-in a chhanletna tur an neih loh avangin inkhel pahnih belhkhawmah 6-2 in an tlawm.

Inkhel hmuhnawm

Kum 1991-a European champion Red Star Belgrade-in Europe club lian zinga tel turin an la ṭha tawk tih an pholang a, Salzburg lakah goal hnih ngawt an chhuah hnuin goal hnih an khung a, khualmuala goal khung tam zawk nihna hmangin an tlang.

First leg-ah Serbian club ṭha Red Star khelmualah an intawng a, team pahnihin goal an khung lo ve ve. Salzburg-in mahni mual hmanthiam an tum tih pholangin Munas Dabbur hmangin minute 48 chhungin goal hnih an khung a, an chak dawn niin a lang.

Mahse, Serbian team huai­senin beidawn an tum lo. El Fardou Ben Nabouhane leh Milos Degenek hmangin an si phurh an sut a, tlawm tura lang team an chak - Champions League an khel dawn.