Forest-in Magpies an hnawt chhuak

Newcastle United-in League Cup-ah beisei tur an nei ta lo - Cham­pionship club Nottingham Forest chuan an ngam loh zawk tura ngaih team hi 3-1 ngawtin an lo sawp a, Rafael Benitez leh Magpies an mualpho.

Premier League club inkhel dangah Everton chuan chiang takin hnehna an chang thung a, an mikhual Rotherham chu 3-1 in an hneh.

Watford chuan khualmualah hnehna an chang ve bawk a, Premier League match hnuhnung ber aṭanga player 11 ngawt an thlak danglam chungin Reading chu 2-0 in an hneh.

Mangṭha Magpies

Newcastle striker hlui Daryl Murphy chuan a club hlui a mikhual zanah minute hnihna lekah goal hmahruai a tauh lut a, goal thum dang zawng hi hun pek belha lut a ni!

Hun pek belh minute hnihnaah Salomon Rondon chuan Magpies tan an si phurh a sut a, an hlim chhung erawh a rei lo hle - Forest tan Matty Cash leh Gil Dias te chuan minute nga chhungin goal hnih an rawn khung lehnghal a, 3-1 in an chak.

Magpies boss Rafael Benitez chuan, "Chance kan insiam tam thei lo a, tlarhmaah hma kan sawn a ngai a ni. Season harsa tak a ni dawn tih kan hre sa a, mahse kan inringtawk a ni," a ti.

Everton an chak

Sum hmang hnem Everton-in Rotherham laka hnehna chang turin harsatna an tawk lo. Gylfi Sigurdsson-a'n minute 28-naah goal hmahruai a khung a, Dominic Calvert-Lewin chuan second half-ah goal hniha chhunzawmin 3-1 in an chak a, Calvert-Lewin goal hnih kara goal khat khung vetu Will Vaulks goal chu scoreline timawitu chauh a ni.

Everton boss Marco Silva chuan, "Result ṭha tak kan hlawh chhuak a ni. A pawimawh ber erawh kan fan-te an ni. Nilaini zanah fans 31,000 in min rawn

ṭawiawm a, kan chunga rinna an nghat hi ka tan chuan result tluk zetin a pawimawh a ni," a ti.

Premier League club Watford-in khualmualah 2-0 in Reading an hneh a, Isaac Success chuan minute 37-naah goal hmahruai a khung a, Domingos Quina chuan goal mawi hmangin a chhunzawm ve bawk.