Cameroon captain hlui tan Eto’o

Barcelona leh Chelsea stri­ker hlui Samuel Eto'o chuan tun hnaia chenna in a neih loh thu documentary film kaltlanga puangtu, Cameroon captain hlui Norbert Owona chu chenna in a pek tur thu a tiam.

Kum 1960 leh 1970 chhoa Cameroon tana khel ṭhin, Captain dinhmun hial pawh lo chelh tawh Owona hi kum 67 mi a ni tawh a, 'inguinal hernia' (tila ril tla) natna avangin tun hnaiah damdawi inah a lut a, Douala khawlaiah in a neih loh avangin a riak kual ṭhin!

Owona hian a nupui cancer enkawl nan leh a fate tan a sum khawl zawng zawng a hmang zo niin a sawi a, an ram sorkar minister ṭhenkhat hnenah a hriselna dinhmun a ṭhat loh thu leh an ramin a ngaihsak tawk lo chu a lungawi loh thu a lo thlen tawh ṭhin a, a beisei ang chhanna erawh a la hmu lo niin a lang.

Eto'o hian an ram captain hlui hi chenna tur in a pek dawn bakah damdawi inah a tlawh thlap a, hemi ṭum hian an ram pawisa CFA francs 500,000 (Rs. 63,203.55) chu kanna sum a tan a hlan nghal.