United hmaah Bournemouth

Manchester United-in zanin dar 7:30 hian tla thei dinhmuna ding AFC Bournemouth an mikhual dawn a, zanin hi Champions League khel tura dinhmun siamremna hun ṭha a ni.

Ole Gunnar Solskjaer-a hote zingah inhliam thar lam an awm lo a, Norwegian manager hian Brighton & Hove Albion an hneh ṭuma player ngai bawk a chhawr a nih pawhin a mak lo ang. United boss hian Seagulls an hmachhawn ṭum hian hun chanve hnu lamah player pawimawh Paul Pogba, Bruno Fernandes, Luke Shaw, Anthony Martial leh Marcus Rashford te chu hahdamna hun ṭha pein a thlak vek. 

Kum 47 mi Solskjaer chuan, "Awlsam taka chak turah min ngai hlawm a, amaherawhchu kan khingpui tur Bournemouth hi team ṭha an ni. Chutihrualin kan ṭhat theih dan bera kan khelh chuan kan chak thei ang," tiin nimin tlai khan a sawi a, rawlthar duhawm Mason Greenwood chuan hma a sawn zel tur thu a sawi bawk.

Bournemouth hian Covid-19 hripui len hnuah vawi thum khel leh tawhin an la chak lo vek a, Old Trafford-ah hian an star striker Callum Wilson chu hrem vangin an chhawr thei dawn lo. Amaherawhchu nikum November thla khan Cherries hian Vitality Stadium-ah United hi 1-0 in an hneh a, goal awmchhun khungtu Joshua King chu a club hlui hmachhawn turin a dam.