Player ṭha kan hralh lo ang - Arteta
Arsenal manager Mikel Arteta chuan a team din mek chu nghet taka kalpui a duh a, nipui bazar inhawn hunah a player ṭha neih lai chelh a duh bakah sum tuak nana inhralh a tum loh thu a sawi.
Gunners hian zanin dar 10:00-ah Premier League khel turin Wolves an tlawh dawn, team pahnih sulhnu hlui thlirlet chuan North London club hi lian zawk fe mah se tun dinhmunah chuan table-a hniam zawk an ni rih.
Arteta naute hian match 32 khelh tawhah point 46 hmuin pariatna an ni, an hmachhawn tur Wolves erawhin point 52 nei tawhin parukna an ni thung - Nuno Espirito Santo naute hi an chunga awm Manchester United nen an point zat a inang.
Arsenal hi an squad a chhah tawk bik lo a, player an neih ṭhat tawk loh zia fiahna chu table-a an dinhmun hi a ni. Player ṭha neih sa an chhuah a nih chuan season tharah pawh club lian dang an elphak dawn lo, hei vang hian captain Pierre-Emerick Aubameyang pawh an chelh a ngai.
Arteta chuan, "Nipui bazar kan hman dan tur hi chiang takin ka la sawi thei lo. Sum tuak nana neih sa hralh ang kha chu a ni lo ang, player siksawi dan tur chu season kan hman lai a hmawr kan bawk dana zir pawh a ni ang," a ti.
Zanina an hmachhawn tur Wolves chungchang sawi zuiin Arteta chuan, "Thawklehkhata khel ṭha thut an ni lo, hun rei tak chhung chu inkhel hmuhnawm leh ngelnghet tak an lo pho chhuak tawh. An player-te an ṭangrual em em a, an mamawhna lai an inthuam chhah zel bawk.
"Kan chunga awm lai an ni a, awlsam taka hmachhawn theih an ni dawn lo. Hnehna kan chang thei a nih erawh chuan a hlu khawp ang, tlarhnung phui taka an rem hi keini chuan tawn tlang kan tum ang," a ti. Nuno Espirito Santo naute hian season kal laiah goal 34 chauh an la chhuah a, anni aia chhuah tlem chu Liverpool (25 goals), Leicester City (31), Manchester United (31), Sheffield United (32) leh Manchester City (33) te chauh an ni.
Zanin Inkhel Tur
Norwich City 5:00 PM Brighton & Hove Albion
Leicester City 7:30 PM Crystal Palace
Manchester United 7:30 PM AFC Bournemouth
Wolverhampton Wanderers 10:00 PM Arsenal
Chelsea 12:30 AM Watford
July 5, Pathianni
Burnley 4:30 PM Sheffield United
Newcastle United 6:45 PM West Ham United
Liverpool 9:00 PM Aston Villa
Southampton 11:30 PM Manchester City
Tottenham Hotspur 12:30 AM Everton