Set nga khelh hnuah Murray a chak

Andy Murray chuan Australian Open 2022 a match hmasa berah inkhel hmuhnawm a chhawp chhuak nghal. Britain tlangval hian set nga an khelh hnuah a khingpui Nikoloz Basilashvili hnehin second round a inhlangkai.

Nimin inkhel dangah US Open champion lai Daniil Medvedev a chak a, champion tura rinkai zinga mi Alexander Zverev pawhin Thawhṭanni zan khan hnehna changin first round a lo patlang ve tawh bawk.

Set nga an khel
Grand Slam vawi thum champion tawh Murray hi a khel bawr hliam vangin a buai rei a, a hliam dam hnuah inkhelh a harsat - a bik takin set nga khelh a harsat ṭhin hle. Tunah erawh seeded 21-na Basilashvili hi 6-1, 3-6, 6-4, 6-7 (5-7), 6-4 in a hneh.

Hnehna chang turin Murray hian darkar thum leh minute 52 a mamawh, seeded ni ve phak lo mah se hliam nei loa a khel tluang thei a nih chuan player ṭha dang tan pawh hmachhawn châkawm lo a ni dawn; a match lehpekah chuan Japanese tlangval Taro Daniel a hmachhawn leh ang.

Kum 34 mi Murray chuan, "Kum thum aia rei chu hun hrehawm ka hmang, tun anga khel chhuak leh tur hian beiseina ka nei reng a, a taka a lo thleng thei hi ka lawm takzet," a ti a, an inkhelhna John Cain Arena chu tun hma lama result ṭha a neih tawhna ṭhin a nih avangin a lunglen thu a sawi bawk.

Medvedev a tlang
Novak Djokovic-a'n season hmasa khan Grand Slam pali kawl khawm vek a tum a, a beiseina titawptu chu Daniil Medvedev niin US Open final-ah a hneh. Russian star hi tun ṭumah pawh hian rinkai zinga mi a ni phak, a khingpui Henri Laaksonen chu 6-1, 6-4, 7-3 (7-3) in a hneh.

Russian star Medvedev hian game hmasa berah a service a hloh nghal a, mahse set hmasa berah hian game a hloh nawn lo. Darkar hnih pawh tling loah hnehna a chang thei a, hard court hi a inkhelh thiamna a nih avangin a inkhel a hmuhnawm.

Seeded pahnihna Medvedev hian a match lehpekah chuan Liam Broady hnehtu Nick Kyrgios a hmachhawn leh ang. Tualchhung tlangval Kyrgios hian Broady hi 6-4, 6-4, 6-3 in a lo hneh ve bawk a, second round inkhel turah chuan a hmuhnawm zinga mi a ni ang.

Inkhel dang
Thawhṭanni zan khan Alexander Zverev a inlan a, German star hian amah ang bawka German tlangval Daniel Altmaier chu 7-6 (7-3), 6-1, 7-6 (7-1) in a hneh, chak mah se a khelh danah hmasawn ngaihna lai a nei nual.

Olympic champion hian Grand Slam hmasa ber a la beisei ve mek a, tun ṭum hi a tan hun ṭha a ni. Vawiin tlaia John Millman nen an inkhelh hunah chuan tihsual neih tlem a zir a ngai tawh ang, mahni tihsual avanga khingpuite point pek hi a tawpah an tuar ṭhin.

Kum 24 mi Zverev hian 2020 khan Australian Open-ah hian semifinal a lut; Melbourne khawpuia inelnaah hian a thlen san ber ṭum a ni. Kuminah hian Roger Federer leh Novak Djokovic te inlan loh avangin kawng a inhawng zau hret.