Kaptan Kohli

Vau thla ni 2, 2008 a ni a, Kuala Lumpur, Malaysia-ah chuan ICC Under 19 World Cup-ah India chu champion niin, captain Virat Kohli chuan nomawi a chawi a, thil lo la thleng tur bul ṭanna a ni.

Tahrik ni 2, 2011, Ṭau thla a ni a, Mumbai-a Wankhede Stadium-ah chuan, ICC World Cup-ah India chu champion niin, India ramah chuan Pathian biaka an biak Sachin Tendulkar chu a teammate rawlthar Virat Kohli a chuan, champion lawm nan, kokichhuan chungin Ground a fan kualpui.

Dhoni-Kohli
Hranghlui mi ropui Sachin Tendulkar te, tuna BCCI President ni mek Sourav Ganguly te, India Coach ni lai Rahul Dravid te, National Cricket Academy Director ṭanglai VVS Laxman te leh Virender Sehwag te ho chuan 2010-2013 inkar chho hian kum tam tak India tana rawng an lo bawl tawhna Cricket khelh chu an chawlhsan a, bung thar kai turin BCCI chuan Mahendra Singh Dhoni chu captain atan an ruat a, a deputy atan Virat Kohli an ruat bawk.

Chutah Dhoni a hun hnuhnung lo inher veleh chuan Test Captain nihna dinhmun hi 2014 kum tawpah Virat Kohli a kutah nghatin, engmaw chen One Day leh T20 lamah Dhoni a captain la ni zui mahse, 2017 aṭang khan, cricket version pathum Test, ODI leh T20-ah Kohli hi India full time Captain a ni zui ta a ni.

Kum sarih chhung International Cricket team captain nih hi thil namai lo a ni a, he kum sarih chhunga India Cricket team captain hlawhtling ber record luahtu Virat Kohli chuan nikum 2021 kum tawp lama IPL team a khelhna Royal Challengers Bangalore leh India T20 captain a nihna aṭangin a inhnukdawk. One Day lamah hi chuan 2023 ICC World Cup, India rama thlen tur thlenga la chelh chhunzawm duh mahse, BCCI thuneituten ball var cricket a captain pahnih hrang neih chu ṭha tiloin, Rohit Sharma kutah an nghat ta a, kar hmasa lama, India-in tui let hnua hnehna an chan theihlohna hmun South Africa lamah, 2-1 a series an tlawm tak avangin, Test Captaincy aṭang pawhin a inhnukdawk leh ta zel hi tunlai India ram titi titam bertu a lo ni ta.

BCCI vs Captain
Maharajkumar of Vijaynagram a captaincy-na hnuaia 1936 a India team hmasa berin England an tlawh tum aṭang daih tawh khan, India cricket history hi Captain chungchang buaina neuh neuh hian a la kiansan tak tak thei lo a. Kapil Dev, Sunil Gavaskar, Mohammed Azharuddin, Sachin Tendulkar leh tuna BCCI President Sourav Ganguly te pawh hi a lo tuar tawh zinga mi an ni.

Sum, ropuina, political inhruipawhna avanga BCCI hruaitu inkar buai, Political Party lam lang taka an inhnamhnawih avanga inchirhthehna te, team inkara player inngeih lote, sumdawng hausa leh Politics heavyweights hovin BCCI president post an hamṭhat nana an hmante chu a lo awm fo tawh ṭhin a. Amaherawhchu, captaincy chungchanga, captain ropui pahnih, vantlang hriat thu inhmu lo leh thu leh hla chham inang lo lutuk hi a la awm ngai awm lo e.

Ganguly vs Kohli
Khatia ICC T20 World Cup 2021 a zawh hnu chuan Kohli-a'n T20 captain ṭhuthleng chu Rohit Sharma kutah a duhthu ngeiin a hlan a. BCCI lamin South Africa tlawh tur team an puang a, One Day captain atan Rohit Sharma chu an ruat thu an puang ta thut! Virat Kohli lahin squad an puan hma darkar khata la awmah chauh, he thu hi hrilh a nih thu a sawi laiin, BCCI lam chuan engkim mai kha a hma aṭanga inrawnho vek hnua thu pawhchah a ni thu a sawi ta thung. A tu zawk chu nge thudik sawi? tih chhana chu vawiin thleng hian India ram titi lailum ber luahtu a la nih hrih ta nih hi maw. Engpawh chu ni se, BCCI chhungah inrelbawlna a fel tawk lo a, an inbiak pawh dan a ṭha tawk lo tih chu a chiang reng mai.

Buaina chhawng hnih
India-in hnehna puanzar an zar hleihtheih lohna ram South Africa chu nikum kum tawp aṭang khan tlawh lehin, tun ṭumah pawh vawi thum inkhel tura a hmasa berah chak mah se a hnuhnung pahnihah an tlawm. Test match vawi thumna an tlawm tuk January 15 khua a lo var chuan khawvel media ho headline chu, "India Test Captain aṭangin Virat Kohli a bang" tih a ni chuai chuai mai.

Titi vakvel, an ti, sawi a awm, a nih hmel tih vel chu Cricket khawvel luahtu a ni leh ta. Titi pakhatah chuan, Sourav Ganguly a kaihhruai BCCI hruaitute chuan, thla leh maia Sri Lanka-in India an rawn tlawh hunah hian, Virat Kohli a tan India tana Test Match-ah vawi za a inlanna tur chiah lo ni bawk nen, Bengaluru-ah a captain nihna thlahna inkhel buatsaih sak an rawt a, amaherawhchu Kohli hian, "Ka tan chuan game pakhat a ni leh mai a, hetiang vel hi ka châk lo e," tiin a chhang a, South Africa tour tawp rual rual hian chawp leh chilhin a banna a thehlut ta a ni, an ti.

Record
Hetia a nih takah chuan, Virat Kohli hian, India tana Test Captain hlawhtling ber record siamin, cricket khawvelah palina dinhmun a luah. Kum sarih zet India a kaihhruai chhung hian ṭum 68-ah hnehna vawi 40 changin, ṭum 17 an chak lo a, vawi 11 draw an nei. Chakna percentage 58.82 siamin Ricky Ponting, Steve Waugh leh Graeme Smith te chiah a phak loh an awm.

Mahni ramah chuan Sakei, tuipuiralah chuan beram an tih ṭhin India team chu a bik takin SENA ram (South Africa, England, New Zealand, Australia) ah ṭum 7 hnehna changin, amah hnaihtu ber Ganguly hnuaiah India ṭum thum an chak. Test match a chak dawn chuan wicket 20 lak a pawimawhzia hriain, bowler panga hmang tlat tactic hi a hlawhtlinpui em em kan ti thei ang. Australia a Series chakpui hmasa ber captain a ni bawk.

Chutirual chuan famkim lo khawvel tih takah, ICC Tournament-a, India nomawi a chawipui hleithei lo erawh a mu tan a ni a, Semifinal leh final vela hmawr bawk fuh hleithei loin a hun a chhiar liam ta thung dawn a ni.

Zanin hian, South Africa an tlawha thawh hnihna, One Day Series chu khelh ṭan leh a ni dawn ta a. Kum tamtak ngaia kan lo neih tawh, India kawrchhung ha chunga ṭhumvawr tura kal ṭhin Virat Kohli ni tawh loin, a lo kaihruai leh kilkawi ṭhin KL Rahul-a'n ( Rohit Sharma a inhliam) a dinhmun a lo luah ve tawh ang a, player pangngai ni chungin a naute ho hnuaiah Kohli kan hmu tawh ang.

Tuna BCCI President Sourav Ganguly pawh kha a vanglaia Captain ropui tak ni chung si khan, a hun hnuhnungah khan chiri leh buaichuar deuha chawlhtir a lo ni tawh a, khatiang tawnhriat lo nei ber tawhin BCCI a kaihruai laia, "India rama hna ko rit ber chu Prime Minister a ni a, a dawttu chu India Cricket Team Captain nih" an tih hial post hetiang deuh nuaia an chiri leh hi chu, hei aia felfai deuha tihdan a awm lo emaw ni le? tih chu ka mimal ngaihdan a ni e.

Silly Point ; - K. Vanlalruata