AFCON: Group A-ah Cameroon an thiam ber

Africa Cup of Nations thlengtu Cameroon-in mahni mualah chuan deh loh sakei huai ang mai an ni tih an pholang a, group hmahruaitu ni chungin last 16 an lut.

Cameroon hian group stage-a an match hnuhnung berah last 16 an lut tawh tih hre sain Cape Verde an hmachhawn a, 1-1 a inhnehtawkpuiin match thum an khelh tawhah tlawm an nei lo.

Vincent Aboubakar chuan Cameroon tan goal hmahruai a khung a, Cape Verde chuan last 16 luh an beiseina chhi nung turin Mendes Rodrigues hmangin an sut a, point an insem.

Group A inkhel dangah Burkina Faso leh Ethiopia te chu 1-1 thoin an inhnehtawk a, Burkina Faso hi Cape Verde nen an point hmuh zat inang mah se head-to-head ah an record a ṭha zawk a, last 16 an lut.

A thlengtu nge nge!
Indomitable Lions (Cameroon sawina) tan Aboubakar chuan minute 39-na hmahruaina goal a khung a, Al-Nassr striker-in tun inelnaa goal nga a khung tlinna a ni der tawh.

Mahni muala khel, team ṭha zawk ni bawk Cameroon hi awlsam taka chak mai tura ngaih an ni a, mahse, a thiam 16 zinga tel beiseina neitu Cape Verde lamin chuti maia awlsama thlah an tum lo.

Minute 53-naah Mendes Rodrigues chuan an si phurh a rawn sut a, a tawp thlenga goal dang an chhuah loh bawk avangin an mamawh point hlu tak an hlawh chhuak - last 16 an luh dawn leh dawn loh erawh a la chiang thei lo thung.

Cape Verde hian Burkina Faso nen point li ve ve an hmu a, mahse, an intawn ṭuma 1-0 a Burkina an ngam loh avangin head-to-head hmangin a tling lo zawk an ni - pathumna ti ṭha pali zinga tel chu an beiseina a ni a, an dinhmun tichiang turin group stage khelh zawh an nghah a ngai.

I hriat loh Aboubakar
Cameroon-in khawvela player langsar ber ber kawlin, captain pawh an nei langsar ṭhin hle - AFCON an thlen kuma captain Aboubakar erawh kum 29 mi ni tawh mah se European football-ah hriat a hlawh tawk lo.

Ram tan vawi 83 inlana goal 32 khung thei striker hi a vanneih zan ni se Cape Verde lakah tun inelnaa a goal rukna khung thei tur a ni a, mahse, Cape Verde goalkeeper Vozinha-a'n a ke bula ball a nam per chu yard 10 vel lek aṭangin a pet goal lo tlat.

Cameroon legend Samuel Eto'o-a'n AFCON inelnaah goal nga khung ṭum vawi hnih a nei a, 2006 leh 2008 khan goal nga ve ve a khung - he record hi Aboubakar-a'n a rawn khum ta a, Cameroon record thar a siam ngei a rinawm.

Aboubakar hian Ligue 1 club Valen­ciennes leh Lorient, Portuguese club FC Porto leh Turkish club lar Besiktas tan hming a lo chher tawh a, June 2012 khan Saudi club Al-Nassr chu kum khata euro maktaduai ruk hlawh turin a zawm a ni.

Burkina Faso vanneihna
Ethiopia-in last 16 luh beiseina nei turin chak ngei ngei an mamawh tih an hria a, inkhel ṭantir aṭangin Burkina an nawr na hle - mahse, keeper Farid Ouedraogo an paltlang hleithei lo.

Kum 25 mi keeper hi first choice keeper Herve Koffi-a'n hri leng a kai vang chauha inlan a ni a, Belgian club Charleroi keeper Koffi-a hmun ruak a luah zo hle.

Minute 25-naah Burkina Faso zawkin Cyrille Bayala hmangin goal an khung hmasa zawk ta nge nge a, Ethiopia an hawihai - minute 52-naah Steeve Yago handball vangin penalty an hmu hlauh.

Ethiopia tan captain Getaneh Kebede lo pen chhuakin goal-ah a chantir a, mahse, goal dang an khung loh avangin 1-1 in inkhel a tawp a, Aston Villa forward Bertrand Traoré hoin Burkina Faso an tlang.