Sawisel hlawh takin Milan chak lo

Referee Marco Serra-a'n inkhelh banah ngaihdam a dil a, mahse awmzia a nei tawh chuang lo. AC Milan chu hun tawp dawna an goal khung hnawlsak an ni a, anmahni lamah a luh leh si avangin Spezia lakah 2-1 in an tlawm.

Milan hian hnehna chang ni se la chuan Inter Milan lehpelin Serie A hmahruaitu an ni ang. Mahse, an chak loh avangin pahnihna an nih chhunzawm a ngai, match khata khel hnem chungin Inter chu point hnihin an phak lo.

Vanduaina
Thawhṭanni zan San Siro-a inkhelah Milan hi an vannei tawk lo, hun ṭha an neih hmasakah an hlah hnem. Theo Hernandez-a'n penalty a hlah a, mahse chawlhlawk hma chiahin Rafael Leao chuan mawi taka keeper chip khumin goal hmahruai a khung ta tho.

Spezia an inthlahrung duh bik lo a, theihtawp chhuahin an bei let. Team thawhrimna rah chhawrtu Kevin Agudelo chuan minute 64-naah si phurh a sut a, team pahnihin hun ṭha insiam tawn zak zak mah se goal khung belh an harsat.

Hun tawp dawn hnaiah pawh 1-1 a la ni. Milan lamin chakna goal khung niah an inngai, midfielder Junior Messias-a'n kum mawi zetin a khung. Mahse, Messias siamsaktu Ante Rebic lakah Spezia lamin an foul nia ngaiin referee Serra chuan goal hi a pawm lo.

Goal aiah Milan hi freekick pek zawk an ni a, an khung lo. Hamrik hnuhnung a rik hma chiahin mikhual lamin Emmanuel Gyasi hmangin chakna goal an khung ta zawk a, inkhelh banah referee-in Milan goal a hnawl danah ngaihdam dil leh hnuhnawh mah se awmzia a nei tawh lo a ni.

Napoli an chak
Hirving Lozano-a goal hnih khung hmangin Napoli chuan Bologna 2-0 in an luhchhuah a, point 46 hmuin Serie A table-ah pathumna dinhmun an luah; pahnihna Milan an phak lohna point hnih chiah a nih avangin champion an la beisei ngam.

Napoli manager Luciano Spalletti chuan, "Bologna khan season an hman ṭhat ṭum an tawng a, match 20 khelh china point an hmuh hnem ber season a nih avangin hmachhawn an awlsam lo. Chutihrualin ka nauten tlin taka hna an thawh miau avangin a tawpah kan lawm," a ti.

Inkhel dangah Fiorentina chuan Genoa 6-0 in an sawp. Arsenal nena sawi zawm lai Dusan Vlahovic-a'n penalty hlah mah se goal dang a khung tho a, season kal laiah league goal 17 khung tawhin Ciro Immobile nen an khung hnem lam a inang.

Kum 21 mi Vlahovic hi Gunners chuan lakluh tumin an bei mek a, Italian club nen chuan an inrem thei niin a lang. Mahse, player leh a agent ten pawisa an phut hnem avangin an la in lei thei rih lo, thlasik bazara an lei lo a nih chuan nipuiah chuan chan a harsa tawhin a rinawm.

Italy - Serie A
Bologna 0 - 2 Napoli
NAP: Hirving Lozano 20', 47'
AC Milan 1 - 2 Spezia
MIL: Rafael Leao 45+1'
SPE: Kevin Agudelo 64'; Emmanuel Gyasi 90+6'
Fiorentina 6 - 0 Genoa
FIO: Alvaro Odriozola 15'; Giacomo Bonaventura 34'; Cristiano Biraghi 42', 69'; Dusan Vlahovic 51'; Lucas Torreira 77'