Insiamṭhat tum Chelsea

Chelsea-in an match hnuhnung berah West Ham 3-2 in an hneh lo a, an elpui Manchester United an khelh hmasak dawn avangin zanin dar 12:30-a Watford an hmachhawn meuh chuan pangana dinhmun luah thei an ni.

Hammers an hneh loh zawhah Blues captain Cesar Azpilicueta chuan, "Inkhel leh tura inpuahchah thuai thuai ka châk. West Ham kan hneh loh hi mimal takin hrehawm ka ti a, Christian Pulisic kha chak loh lama tel tur a ni lo," tiin a inthiam loh thu a sawi a, penalty hlawhchhuaktu Christian Pulisic erawh a fak thung.

London club khingpui tur Watford hi hun tam zawk table mawngphaha awm an ni a, relegation zone pawnah awm rih mah se an hnuaia mi Aston Villa leh Bournemouth te aiin point khat chauhin an hmu tam. Frank Lampard-a hote hi an mual Stamford Bridge-a khel tur a nih avangin chak ngei tura ngaih an ni a, chutihrualin Watford hian February thla khan champion thar Liverpool 3-0 in an sawp tih hriat a ṭha.