Ngai ru, FIFA tlangau chu, Lalber thar a lo piang ta!

Lionel Messi leh Cristiano Ronaldo rorelna football khawvelah lal thar pekin kan awm a, a hming chu Robert Lewandowski a ni - a aia thiam dang reng reng an awm lo!

Best FIFA Football Awards chu Thawhṭanni zan khan semchhuah a ni ta a, chawimawina ngaihhlut hlawh ber Best FIFA Men's Player of the Year award chu Bayern Munich goal thun khawl Lewandowski-a'n a dawng.

Polish striker hian he award dawng tur hian Paris St-Germain forward Lionel Messi leh Liverpool forward Mohamed Salah a khum a, pahnihna Messi aiin point li chiahin a sang - an inthlau lo hle.

A hming Lewy
Lewandowski hian nikum khan Bundesliga match 34-ah goal 43 a khung a, German legend Gerd Muller-a record, kum 49 zet ding tawh chu a khum - hei mai a ni lo, season hmasa khan Bayern chu Bundesliga, FIFA Club World Cup leh UEFA Super Cup champion nomawi a chawipui bawk.

Polish striker chuan, "Hun rei lo te liam taah khan Muller-a record ka khum ka rin leh rin loh min zawt ula, thil theih loh a nih thu ka sawi ang. Kan zingah Muller a awm tawh lo a, mahse, ani awm lo se he record hi a awm dawn loh avangin lawmthu ka hrilh duh a ni," a ti.

November thla khan Ballon d'Or chawimawina chu Messi hnenah hlan a ni a, mi tam takin Lewy an vui pui - tunah erawh Best FIFA award a hum ta a, a kum zawna he award a dawn avangin a fan-te pawh hahdam takin an awm thei ang.

Messi & Salah
Argentine forward Messi-a'n pahnihna dinhmun a luah a, Lewy-a'n point 48 a hmuh laiin PSG forward hian point 44 a hmu thung - an inkarah point li a awm a, Messi vanneih zan a ni lo.

Fans 528,245 zetin Salah tan vote thlak mah se national captain, coach leh media ten vote an neih ve ṭheuh avangin Salah-a'n point a hmu tam tawk lo a, point 39 hmuin a sang pathum chhawpchhuah zingah pathumna a ni.

Lewy hian fans vote a hmu tlem ber a, Polish striker hian vote 353,714 chiah fans aṭangin a hmu. Messi vote tu zat phei chu 708,206 an tling a, mahse, coach, captain leh media duhsakna dawngtu Lewy-a'n lawmman a hum haw.

Best FIFA Men’s Player lo ni tawhte
Kum Hming Club
2016 Cristiano Ronaldo Real Madrid
2017 Cristiano Ronaldo Real Madrid
2018 Luka Modric Real Madrid
2019 Lionel Messi Barcelona
2020 Robert Lewandowski Bayern Munich
2021 Robert Lewandowski Bayern Munich

Top three vote hmuh dan
# Name Coaches Captains Media Fans Scoring
(pts) (pts) (pts) (pts) (pts)
1 Robert Lewandowski 535 555 589 353,714 48
2 Lionel Messi 254 344 409 708,206 44
3 Mohamed Salah 271 176 184 528,245 39