Special award dawngtu Ronaldo a chawl dawn lo

Best FIFA award sem a nih hnua a vawi khat nan mimal award ngaihhlut ber dawng turin Ronaldo hming chhawpchhuah a ni lo a, mahse, international football-a goal khung hnem ber record thar a siam avangin Special award pek a ni thung.

Iran legend Ali Daei chuan international football-ah ram tan match 148 khelin goal 109 a khung a, he record hi rei tak chhung chu a ding tawh. Mahse, Ronaldo chuan record thar siamin match 184-ah goal 115 a khung a, hei vang hian chawimawina hlan a ni.

Ronaldo chuan, "He record hi ka siam ang tih ka lo ring ngai lo. Ka pawl zah em em FIFA aṭanga hetiang chawimawina ka dawng thei hi ka lawm a, hetiang hun ropui ka tawng thei hi ka inchhuang hle a ni.

"Inkhel zel turin ka la tuihal reng a, goal khung mai ni loin, mipui tana ennawm chhawp chhuak turin ka la inpeih reng a ni. Inelna ka hmachhawn lai mai ni lo, training ka neih lai thleng hian ka la phur reng a, kum 37 tling dawn tawh mah ila nuam ka la ti a, inkhelh zel ka duh," a ti!

Manchester United striker chuan, "Mi ṭhenkhatin engtia rei nge ka la inkhelh theih dawn, min zawt fo a, rilru puthmang hi thil pawimawh ber a nih avangin kum li emaw kum nga emaw chu ka la inkhelh theih ka ring. Duat taka i taksa i enkawl chuan ani pawhin i duh a pe let ang che," a ti a, inkhel zel tura a thawhrim thu a sawi.

Ronaldo hian tun season-ah United tan match 21 khelin goal 14 a khung leh der tawh a, assist vawi thum a nei bawk - a la tar lo.