Lewy, Messi & Salah - Tu nge an vote?

Best FIFA Men's Player thlang turin national team captain, coach, media leh fan ten vote an nei a, a sang zual pathum Lewandowski (Poland), Messi (Argentina) leh Salah (Egypt) te chu an ram captain ṭheuh an nih avangin vote an nei vek tihna a ni.

Lewy-a'n Chelsea tana Champions League leh Italy tana Euro nomawi chawitu Jorginho chu chawimawina dawn phu berah ngaiin pakhatnaah a dah a, pahnihnaah Messi dahin, pathumnaah Cristiano Ronaldo a dah thung - Salah a vote lo.

FIFA danah pakhatnaa an dah hian point nga an hmu a, pahnihnain point thum hmuin, pathumna chuan point khat chiah an hmu thung.

Messi-a'n top three-a awmpuite aiin PSG tana a khelhpuite thiam a ti zawk a, pakhatnaah Neymar dahin, pahnihna chu Kylian Mbappe niin, pathumnaah Real Madrid striker Karim Benzema a dah.

Salah-a'n Premier League lama a inkhel a hmuh ngun Jorginho chu chawimawina dawn phu berah a ngai a, inelna rilru dah ṭhain pahnihnaah Messi a dah a, pathumnaah Lewy a awm bawk.

Portugal aiawha vote thlaktu Ronaldo-a'n Lewy thiam a ti ber a, a hnuaiah Chelsea player pahnih N’Golo Kante leh Jorginho a dah bawk - Messi a vote lo.