Man United khingpui tur Brentford

Manchester United-in tun season Premier League match hmasa berah Leeds United 5-1 in an sawp a, Jadon Sancho lan lakluh tawh bakah Cristiano Ronaldo a rawn kir dawn avangin champion nomawi beisei pawh a sang leh hman hle.

Tunah erawh Ole Gunnar Solskjaer an ban a, champion sawi ri tawh loin Champions League khelh phak pawh a harsa ṭan. Norwegian manager thlaktu Ralf Rangnick hnuaiah hma an la sawn hlei thei lo a, an khingpui apiang an tum tawk zel. Zanin dar 1:30 hian Manchester United hian Brentford Community Stadium-ah Premier League kai thar Brentford an hmachhawn dawn.

Man United hi an match hnuhnung berah Aston Villa nen an inhnehtawk a, hemi ṭuma hrem vanga khel lo Scott McTominay leh Luke Shaw te chu Brentford lakah chhawr theih an ni tawh. Cristiano Ronaldo leh Marcus Rashford te pawh an inlan theih a beiseiawm bawk. Chutihrualin academy player Anthony Elanga-a'n German manager rin a la hlawh thei bawk.

Rangnick-a hote tan point thum hmuh a beiseiawm a, hmu ta reng pawh ni se inchhuanna tur a awm lo. A chhan chu Liverpool-in Mohamed Salah leh Sadio Mane te tel loin 3-0 in an hneh zo chiah a, hemi hma hian Southampton-in 4-1 in an hneh bawk.

Hriat tel tur erawh Brentford chak lohna hi khualmual a ni a, an mualah erawh tawh an khirh viau. Brentford Community Stadium-ah Bees hian Arsenal 2-0 in an hneh a, Liverpool (3-3) an chelh a, Chelsea leh Manchester City an hneh lohna pawh 1-0 chauh a ni.

Brentford record thlir hian Man United tan point thum chiang saah ngaih theih a ni lo. Chutihrualin Bees hian Julian Jeanvier, David Raya, Charlie Goode leh Josh Dasilva te inhliam vangin an la inlan thei dawn lo a, AFCON khel tura zin Frank Onyeka a tel thei dawn lo bawk.