Player langsar an chak

Australian Open khelh laiah hmeichhe player langsar an la chak zel. Inelna neih ṭan niah Ashleigh Barty leh Simona Halep ten set hloh loin an khingpui ve ve an hneh a, harsatna lian tham tawk loin second round an inhlangkai.

World number 1 leh seeded pakhatna ni bawk Barty chuan Lesia Tsurenko chu 6-0, 6-1 in a hneh, minute 54 chhunga game khat chauh a hloh avangin Australian star hi a khel ṭha tawk tih a chiang.

Hnehna a chan hnuah Barty chuan, "Rod Laver Arena-a inkhelh hi chu engtik lai pawhin a nuam, a bik takin hnehna changtu nih hi a nuam zual. Mahni ram ngeia boruak ṭha neih aia hlimawm a awm thei tawh chuang lo," a ti.

Wimbledon champion lai Barty hian a match lehpekah chuan Lucia Bronzetti a hmachhawn leh ang.

Inkhel dangah Simona Halep chuan Magdalena chu 6-4, 6-3 in a hneh. Romanian star hi hliam vangin season hmasa khan a inkhel tam lo. Kum khat leh thla li hnua a vawi khat nan Melbourne Park-ah hlawhtlinna chan leh a beisei.