Chelsea tan chawimawina langsar

January 2021-a Chelsea a zawm hnuah Thomas Tuchel-a'n Blues-ah harhtharna a thlen nghal a, Premier League-ah top four ni chunga season a kharpui bakah Champions League nomawi a chawipui.

PSG-in duh loa an ban hnu Tuchel-a hnathawh hi football khawvelin a hmuh hmaih lo a, Coach of the Year chawimawina chu German coach hnenah hian hlan a ni.

Chelsea keeper Edouard Mendy Goalkeeper of the Year-ah thlan a ni a, Senegalese keeper chuan, "African keeper zinga he chawimawina dawng hmasa ber ka ni thei hi ka inchhuang takzet ani," tiin a sawi.

Chelsea hmeichhe team enkawltu Emma Hayes chu hmeichhe coach ṭha bera thlan a ni a, kum 45 mi coach hian Chelsea chu season hmasa khan FA Women's Super League, FA Cup leh League Cup-ah te champion nomawi a chawipui a ni.