Lakers chak ve leh ta

A zawna match thum an tlawm hnuah Los Angeles Lakers an chak ve leh ta. Lakers hian anmahni aia NBA regular season hmang ṭha zawk Utah Jazz chu 101- 95 in an hneh a, playoff khelh phak an tumna a la nung zel.

Lakers tan Anthony Davis chu hliam vangin a la inlan thei lo. Davis awm lo mah se LeBron James-a'n a theihna sang tak a pholang, minute 37 a khelh chhunga point 25 neiin, rebound vawi sarih a lak zat chiah hi assist a nei bawk.

James bakah Russel Westbrook a che ṭha, ani hian point 15 neiin, player pathumin point 10 chuang an nei thei bawk. An khelh fuh ni chuan Lakers hi team ṭha hneh turin an ṭha tawk, mahse ṭha taka khelh tluan an harsat.

Nimin zing inkhel dangah Phoenix Suns chuan San Antonio Spurs chu 121-107 in an hneh a, match 34 an chak tlinna niin Western Conference hmahruaitu an nihna an sawhnghet zel - pahnihna Golden State Warriors aiin vawi thumin an chak hnem zawk.

NBA - Nimin Results
Portland Trail Blazers 98 - 88 Orlando Magic
Toronto Raptors 99 - 104 Miami Heat
Oklahoma City Thunder 102 - 104 Dalls Mavericks
Phoenix Suns 121 - 107 San Antonio Spurs
Utah Jazz 95 - 101 Los Angeles Lakers