Real-in Barcelona an chhuk en

Barcelona tan champion beiseina a bo ṭan a, Real Madrid tan beiseina a sang zel thung. Zinedine Zidane-a enkawl Real hian Ningani zan khan Getafe chu 1-0 in an hneh. 

Real goal awmchhun hi Sergio Ramos-a'n penalty aṭanga a khung a ni a, Getafe-in a chhanletna tur an nei lo. Real an chak a, La Liga-ah point liin hma an hruai fal ta. Pathianni tlai dar 5:30-ah Real Madrid hian league match an khelh chhunzawm lehnghal dawn a, Athletic Bilbao chu khualmualah an lenchilh ang. 

Pahnihnaa awm Barcelona chu Pathianni zan dar 1:30-ah an inlan dawn bawk a, season thara Champions League khelh tum Villarreal an lenchilh dawn avangin a awlsam dawn lo. 

Getafe-in season thara Champions League khelh an tum avangin awlsam taka Real Madrid chak tir an tum lo a, goal venhim ringawt ngaihtuah bik loin chak an tum ngam. 

Inkhel ṭantir minute 12 chhungin vawi thum ngawt Real Madrid keeper Thibaut Courtois an enchhin hman a, Belgian keeper chet ṭhat lai a nih avangin an vannei tawk lo. Kum 28 mi goalkeeper hi season hmasaa Real a pan khan beisei a phak lo a, tunah erawh Atletico Madrid leh Chelsea lama a theihna ang kha a pholang ṭan leh ta - a tira nuihtute kha an nuih a za tawh lo ang. 

Belgium tana vawi 79 inlan tawh keeper hian La Liga match 16-ah clean sheet a nei a, European top five league-ah ani aia goal chhuah tlem zawk goalkeeper an awm rih lo. 

Getafe-in rin loh taka Real an nawr theih laiin Real erawh an chuti lua lo a, Luka Modric leh Karim Benzema te hun ṭha neih pawh chance naran tiin a sawi theih. 

Real hi point khata an lungawi mai a ṭul dawn nia a lan hnuah penalty an hlawh chhuak a, Getafe left back Mathías Olivera-a'n hun tawp nan minute 11 chauh a awm tawh tiha  Dani Carvajal a tih tluk chu Real tan chuan vanneihna a ni. Penalty pet turin Sergio Ramos a lo pen chhuak a, Spanish defender hian a zawna penalty vawi 21-a chhuih luhna ni turin goal-ah a chantir - hun tawp thlengin goal dang a lut lo a, Real an chak. Kum 34 mi Ramos hian tun season inelna hrang hrangah match 40 khelin goal 11 a khung tling ta a, season khata goal a khung hnem ber record season hmasaa a siam goal 11 chu a nihrual. 

La Liga khelh chhunzawm leh a nih khan Barcelona chu table chung berah an awm a, a hnuaiah Real an awm - tunah erawh thawnthu a dang ta. Real chu hmahruaitu an ni a, Barcelona-in an um mek. 

Real Madrid hi La Liga khelh chhunzawm leh a nih hnua match ruk an khelhah an chak vek a, Barcelona erawh match ruk an khelhah vawi thum chu an khingpui an inhnehtawkpui tawh. La Liga-ah match nga chauh khelh tur a awm tawh a, Real Madrid hian match nga khelh tur an neihah vawi li hnehna an chan theih chuan La Liga nomawi an chawi ang. Real hian La Liga nomawi an chawi thei a nih chuan kum 2012 hnua league-a an vawi hnih champion-na a ni dawn a, Zinedine Zidane hnuaiah tho 2016-17 season khan league nomawi hi an lo chawi tawh.

La Liga khelh chhunzawm leh a nih hnua chak thei lo Real Sociedad chuan hnehna an chang ve ta hram a, league table mawngphah luahtu Espanyol chu 2-1 in an hneh. Espanyol hian David Lopez hmangin minute 10-na lekah hma hruai mah se Espanyol hian second half-a Willian Jose leh Alexander Isak goal hmangin an chhanglet a, point thum hlu tak an hlawh chhuak. 

Sociedad hian hnehna an chan avangin Champions League khelh beiseina an neih chu a nung thar ve leh ta a, mahse top four-a awm Sevilla an phak lohna chu point sarih lai a la ni. La Liga khelh chhunzawm a nih hnuah Sociedad hian match ruk an khel tawh a, vawi khat an khingpui an inhnehtawkpui a, vawi li an tlawm a, vawi khat an chak - palina ni hman kha pasarihna an ni mek.

July 02, Ningani Zan

Eibar    0 - 2    Osasuna

OSA:  Rubén García 6'; 74'

Real Sociedad    2 - 1    Espanyol

RES: Willian José 56'; Alexander Isak 84'

ESP: David López 10'

Real Madrid    1 - 0    Getafe

REM: Sergio Ramos 79' (P) 

Zanin Inkhel Tur

Celta Vigo    08:30 PM    Real Betis

Real Valladolid    08:30 PM    Deportivo Alavés

Granada    01:30 AM    Valencia

July 05, Pathianni Zan 

Athletic Bilbao    05:30 PM    Real Madrid

Espanyol    08:30 PM    Leganes

Osasuna    08:30 PM    Getafe

Villarreal    01:30 AM    Barcelona