Championship a ngaihnawm chho zel

Premier League hnuai chiaha inelna Championship a ngaihnawm chho a, hmahruaituah Leeds United an awm te chuan ngaihven a hlawh phah hle. 

Leeds United hi 2003-04 khan Premier League aṭangin an relegate a, hemi hnu hian English football inelna sang ber hi an khel leh tawh lo. Hei chauh hi a ni lo a, Leeds hi League One-ah te an tla thla hman. Tunah erawh Marcelo Bielsa hnuaiah an insiamṭha a, Championship-ah pakhatna dinhmun an luah - an chesual viau a nih loh chuan Premier League chu an khelh mai a rinawm ta hle.

Zanin dar 7:30 hian Leeds hian Blackburn Rovers hmachhawn turin Edwood Park an tlawh dawn. Bielsa hote hian an match hnuhnung berah table mawngphaha awm Luton Town nen an inhnehtawk a, an hnuai chiaha awm West Brom nen an inthlauhna point khat chauh a nih avangin chetsual a thiang tawh lo. Baggies hian July 5, Pathianni zanah Hull City an mikhual dawn. Wayne Rooney telna Derby County pawhin playoff khelh an la inbeisei ve zel a, vawiin tlai dar 5:00 hian palina dinhmuh luahtu Nottingham Forest an hmachhawn ang.