Siami kutah Asian Games Silver Medal

Lalremsiami Hmar chuan Asian Games 2018-ah India tan silver medal a vaw chhuak. Mizo nula hockey khel thiam Siami telna India team hian nizan khan final-ah Japan an hmachhawn a, inkhel inhnehtawk takah 2-1 in a vanduai zawkah an ṭang.

Asian Games-ah Kolasib nula Siami'n match a khel kim vek a, match hmasa bera Indonesia an hneh ṭumin goal khat a khung bakah, Kazakhstan lakah hattrick a siam. Gold medal la phak chiah lo mah se Mizo infiammi zingah Asian Games-a medal la hmasa ber a ni. Mizoram sorkarin Sports Incentive Cash Award a kalpui ang chuan Rs 4,00,000 a dawng thei dawn a ni.

1982 Asian Games-ah khan a vawi khat nan hmeichhe hockey hi telh a ni a, inelna thlengtu India chuan South Korea hnehin champion hmasa ber an ni. Bul ṭan ṭha viau mah se India nula ten medal dang an dawng leh mai thei lo, 1998 khan final lut leh chauhin–South Korea an ngam lo thung.

India vanduai
GBK, Hockey Field in Jakarta-a final khelhah Mizo nula Siami'n inkhel bul a ṭan a, captain Rani Rampal thlawp turin pawh hnun hret a ni. Japan lamin bul an ṭan fuh zawk, penalty corner an hmuh hmasak ber hmang ṭangkaiin Shihori Oikawa hmangin minute 11-ah hma an hruai.

Quarter hnihnaah Japan player ten ball an vuak chhuah fuh tawk lo vangin, midfielder Neha Goyal chuan minute 25-naah India si phurh a sut, 1-1 in chawlhlawk an hmang.

Second half-ah team pahnih an inkhel tawk hle, world number 14 Japan lamin penalty corner bawk an hmang ṭangkai nawn; Motomi Kawamura chuan minute 44-naah goal khung lehin, a tawp thlengin an hum thei. Hun tawp lamah India-in thapui thawhin bei let mah se tlarhnungah an dingkhawm a, goal khungna kawng a inhawng tawh lo.

Japan hi an vawi khat champion-na chiah a ni a, gold medal an dawn vanga an lawm tluk zeta lawmawm chu 2020 Olympic atan an tling nghal hi a ni ang. Summer Olympic hi an ram khawpui Tokyo-ah neih a ni dawn.

Nimin tlai khan India mipa hockey team lamin semifinal an khel a, India tlangval ten final thlen ngei tum mah se Malaysia an ngam lo. Hun pangngaiah 2-2 a nih hnuin, penalty shootout-ah India 6-7 in an chak lo. Ram pahnihte te hi vawi 101 an intawnna chiah a ni a, record nei ṭha zawk India hi vawi 70 ngawt chak zawk tawh mha se tun ṭumah erawh a vanduai zawkah an ṭang.

Lalremsiami Hmar
Zinkawng
2000 Lalremsiami Hmar pian kum.
2011 Kum 11 mi chauh niin Thenzawl Hockey Academy a zawm.
2016 National Hockey Acdemy a awm turin thlan a ni a, November thlaah a lut.
2017 India Junior Camp tana training a nei lai chu India coach Harendra Singh-a'n hmu fuhin, senior team tana khel turin a ko.
2017 November thlaah India tan Asian Cup a khel a, match zawng zawngah inlan vekin goal hnih a khung; India a champion pui.
2018 April 4 - 15 chhunga neih 2018 Commonwealth Games-ah India tan koh a ni a, kum 17 mi chauh a la nih avangin squad player naupang ber a ni; Malaysia 4-1 a an sawp ṭumin goal khat a khung.
2018 Women’s Hockey World Cup 2018-ah India aiawhin a inlan a, kum naupang ber a ni zel. India hi semifinal a thlen pui a, Italy an hneh
ṭumin goal a khung.
2018 Asian Games-ah India ai a awh leh a. Asia ramte inelna lianah hian goal li (4) khungin, India tan Silver medal a vuak chhuak a, Mizo zinga medal la hmasa ber a ni bawk.

Sam 37-na
Lalremsiami Hmar hian Women's Hockey World Cup 2018 an khelh dawn khan, Sam 37-na "Amah chu ring la, Aman a ti vek ang," tih chu a nun kawng hruaitu atan a hman ṭhin thu Vanglaini a hrilh tawh a, Asian Games an khelh thlengin he thu hi a la vawng chhunzawm; ropuina a channa hmun hockey khelmualah pawh a fak Pathian a theihnghilh lo.

Kum 11 mi chauh a nih laiin, mahni in lum kal sanin Thenzawl Hockey Academy a zawm, a kum ala naupan em avangin a chhungte a ngai ṭhin hle - chutih rualin a Mizo puite nena training nei ho an ni a, mahni chawhmeh duh zawng an la ei theih bakah Mizo ṭawnga biak theih vek an la nih bawk avangin lunglen chu a la tuar thei viau.

India camp-ah koh a ni a, Mizo dang an awm lohna hmunah hnam dang ṭawng thiam loa bul ṭan chu a harsat thu sawiin, "A chang chuan camp chhuahsan a haw daih maite hi ka chak ṭhin, mahse hlawhtling tur chuan hrehawm paltlang hmasak a ngai," a ti a, hun harsa a tawh lai hian Sports and Youth Services (SYS) coach Lalrampari chuan a fuih nasat thu a sawi bawk.