MFA leh Zonet-in ṭangkai zawka Lammual an hmang hi ka lawm – Sports minister

Mc Dowell's No. 1 Soda Mizoram Premier League Season 7 chu nizan khan Chanmari YMA Hall-ah Mizoram sports & youth services minister Zodintluanga chuan a kickoff.

Kick off chu

MPL7 kickoff zan hian MPL board chariman PC Vanlalhruaia'n handbook a tlangzarh a, Mizo football legend S. Malsawmtluanga kaihhruaina hnuaiah team tin captain-ten oath taking an nei bawk.

Club model-ten jersey pholanna hun a nei a, football hunpuiah hian football hruaitu, football player, sawm bik leh sponsor-te an pungkhawm. MFA honorary secretary Lalnghinglova Hmar chuan season thar awm tur a thlirlawk a, NIVIA nen thawhhona an nei thei chu lawmawm a tih thu a sawi a. MPL7-a Nivia Antrix hman a nih tur thu sawi lang lehin Indian Super League nen Nivia kut chhuak ve ve an pet thei chu lawmawm a tih thu a sawi.

Sports Minister thukhawchang

MPL Kickoff ṭum ruk neih a ni tawh a, football-a mi challang tak tak ten an kickoff tawh ṭhin. Tun

ṭuma kickoff-tu Zodintluanga hi Lammuala artificial turf phah theihna tura sulsutu a ni a, MPL ṭan theihna chhan bulpui ber tiha sawi theih a ni.

Lammuala grass phah ṭan dan sawi langin sports minister Zodintluanga chuan, "Mizoram Football Association hian khelmual ṭha neih an duh thute an sawi ṭhin a, Sports Minister ka nih hlim khan chu chu ngaih pawimawhah ka nei. MFA treasurer Tuikhuahthanga hi hming pawh lam rik a phuin ka hria a, tunah damloh vangin Kolkata lamah a inenkawl mêk a. Ani nen hian Goa-a India rama artificial turf hmasa ber en thli thlai turin kan zuk zin vang vang a ni," a ti.

MPL khelhna Lammualah hian kum 2011 khan artificial turf phah a ni a, India hmarchhaka a hmasa ber phah a nih theih nan Mizoram sports minister chuan a hmun ngeia a kal chilh thu a sawi a, hemi hnu kum khatah hian MFA-in league mumal leh changtlung zawk a kalpui nghal bawk.

Zodintluanga chuan sawi chhunzawmin, "MFA leh Zonet ṭangkawpin kan thawh ve ang anga kan siam Lammual chu ṭangkai zawka hman dan an thiam ta a, MPL an rawn tichhuak ta hi a lawm ber zinga mi ka ni ve hial ang. He khelmual ṭha hi siam ringawt ila, hman ṭangkai ni ta lo se, mi tam tak chuan sum sen thlawnna tiin an sawisel ang," tiin MFA leh a thawhpui Zonet hnathawh chu lawmawm a tih thu a sawi.

Lammuala artificial turf phah a nih hnuah Rajiv Gandhi Stadium, Mualpuiah phah a ni leh a. Champhaiah pahnih phah a ni tawh a, Lungleiah Ṭhuamluaia Mual bakah a dang phah mek thu a sawi lang a. Lawngtlai, Kolasib leh Serchhipa grass phah leh stadium siamte chu hawn theiha peih a ni deuh vek thu sawi langin Hnahthial leh Saitual lamah grass phah turin hna a kal mek thu a sawi bawk.

Sports minister chuan football kaltlanga Mizo ṭhalai tam takin eizawnna an nei thei chu lawmawm a tih thu a sawi a, Indian Super League ni lo football inelna lian dang zawng zawnga Mizoramin nomawi a chawi thei chu ropui tih a sawi bawk.

Mizoram Premier League Season 7 hi team pariat Chhinga Veng FC, Aizawl FC, Mizoram Police, Chanmari FC, Ramhlun North, Bethlehem Vengthlang, Chawnpui FC leh Eletric Veng FC ten September 6 aṭangin Lammualah an khel ṭan ang.