Khawvel manager ropui ber zinga mi ka ni - Mourinho

Manchester United-in kum 26 hnua season bul an ṭan chhiat ber ṭum an tawng a, hetiang boruak karah hian Jose Mourinho chuan khawvel manager ropui ber zinga mi a nih thu a sawi.

United hian league match hmasa pathum aṭangin vawi hnih an chak lo a, Pathianni zan dar 8:30 hian Turf Moor-ah Burnley an tlawh dawn.

A zam lo

Manchester United chhungkaw boruak a ṭha tawk loa a lan avangin, Burnley nena an inkhel result hian Portuguese manager hmalam hun a hril a rinawm.

Mourinho hi tlarhnung player a duh laksak a nih loh avangin media hmaah United board leh executive vice-chairman Ed Woodward chunga a lawm lohna lantir a hreh lo a. Tun season-a an result a ṭhat loh bawk avangin United boss hian pressure a ngah a, amaherawhchu pressure chhem kian ṭhen nan manager hlawhtling hian a sulhnu chu chhuang takin a sawi lang.

Kum 55 mi Mourinho chuan, "Italy, Spain leh England-a champion thei vek awmchhun ka ni a, season liam ta pawhin season ṭha tak ka hmang a, hei erawh min pawm sak duh lo. United-a season hnih ka awm chhungin Europa League kan chawi a, English club zinga Europe-a champion thei hnuhnung ber kan ni," tiin amah sawiseltute a khak let.

United-a a hnathawh pawh a ṭhat tawk thu sawiin Mourinho chuan, "Italy, Spain leh England-a ka nomawi lian tham vek a ni a, chutiang bawkin season liam ta Manchester United pahnihna ka nih pui kha hlawhtlinna ropui zinga mi a ni," a ti. Portuguese manager hian Champions League-ah FC Porto leh Inter Milan champion pui tawh a, a hlawhtlinna ropui tak tak zingah United pahnihna a nih pui chu a dah tel!

Portuguese manager chuan, "Khawvel club ropui ber zinga mi manager ka ni a, chutiang bawkin keimah hi khawvel manager ropui ber zinga mi ka ni," tiin United manager ni tura a tlin tawk thu a sawi lang.

A insawifiah zel

Manchester United-in kar tawpa Tottenham an hneh loh ṭumin fans ṭhenkhat chu awm tlaiin Mourinho leh a naute hnathawh chu an chetzia leh au rawl hmangin an lawmpui tih an lantir.

Portuguese manager chuan hemi chungchang hi sawiin, "Fans chet dan kha ka tan ni loin player-te leh team tan a ni. Mipui khan minute khatna aṭangin player-te kha an au phur a, ka naute pawh an khel ṭha reng bawk. Kan chak loh avangin point kan hlawh chhuak lo a, amaherawhchu kan chetzia khan mipui a tilawm a ni," a ti.

A chetdan chungchang sawiin Mourinho chuan, "Kan chak a nih chuan khelmual chhuhasan hmasa ber ka ni ṭhin a, mahse mahni muala chak lo kan nih avnagin thil thlen dan thlira awm khawtlai kha ka tih tur a ni. Mipui min ṭawiawmna avangin tunkar pawh kan tan chuan hun harsa a ni lo a, beiseina sang tak nen result ṭha zawk kan neih ngei kan beisei," tiin point thum hlawhchhuh a beisei thu a sawi lang.

Burnley hi...

Clarets hian Southampton nen an inhnehtawk hnuah Watford leh Fulham te hneh loin league-ah point khat chiah an la hmu. Hei chauh hi a ni lo, Burnley-in Europa League khelh an tumna chu Ningani zan khan Olympiakos lakah a thamral a, United nena an inkhelh tur atan hian ni hnih chiah hahdamna hun an nei bawk.

Portuguese manager chuan Turf Moor-ah Burnley leh Olympiakos inkhel hi a thlir a, Sean Dykes-a hote khelh dan hmang a fak. United hian Clarets an hmachhawn hunah hian defender Phil Jones chu inhliam vangin an chhawr thei dawn lo a, Marcos Rojo pawhin team training zawm tawh mah se inkhel turin a la inpeih lo. Mourinho buaina tur chu ṭum dang ang thoin tlarhnung bawk a nih a rinawm a, hei vang hian Burnley lakah hian point thum bakah clean sheet a pawimawh ang.

Zanin Inkhel Tur
Leicester City 5:00 PM Liverpool
Brighton & Hove 7:30 PM Fulham
Chelsea 7:30 PM AFC Bournemouth
Crystal Palace 7:30 PM Southampton
Everton 7:30 PM Huddersfield Town
West Ham United 7:30 PM Wolverhampton
Manchester City 10:00 PM Newcastle United
September 2, Pathianni
Cardiff City 6:00 PM Arsenal
Burnley 8:30 PM Manchester United
Watford 8:30 PM Tottenham Hotspur