Vettel a inringtawk

Pathianni zan dar 6:40 hian Autodromo Nazionale Monza tlankawngah Italian Grand Prix neih a ni dawn a, Ferrari driver Sebastian Vettel chuan an team hmunpuia inelna neih tur ni mah se an tan boruak a san bik loh thu a sawi.

German tlangval Vettel hi driver championship lamah Lewis Hamilton aiin point 17 in a hniam zawk mek, tun inelnaah hian a chak a nih chuan an inkar a zim dawn a, Monza-ah hi Mercedes driver Hamilton leh Nico Rosberg te lo chetṭhat tawh ṭhinna hmun a nih avangin Ferrari tan a awlsam dawn lo.

World champion vawi li ni tawh Vettel chuan, "Car ṭha tak kan nei a, mahse a ṭhatna angin kan hman chhuah a ngai dawn. Season hmasa lama kan buaina tawh ang khan kan pumpelh chho mek, kawng dik kan zawh avangin beiseina pawh kan nei sang hle," tiin a sawi.

Mercedes F1 boss Toto Wolff chuan tun hnaia Ferrari hmasawn dan a hmuh hmaih lo a, an tan champion nomawi humhim a awlsam loh tur thu a sawi. Chutih rualin season dang ang bawka hnehna chan theih a inbeisei; Wolff chuan, "Monza hi Mercedes tan hmun ṭha a lo ni tawh ṭhin, kuminah pawh kan thawkrim em em a, eng thil nge rawn thleng tih chu ka hre chak tawh hle," tiin a sawi.