Ronaldo leh Dybala an inkawp rem - Sarri

Juventus manager Maurizio Sarri chuan Cristiano Ronaldo leh Paulo Dybala an inkawp rem thu a sawi a, forward pahnih hi tun hma zawng aiin khelmual chhungah pawh ball an inpek nasat thu a sawi tel bawk.

Old Lady hian zanin dar 8:45 hian Torino nen 'Derby della Mole' an khel dawn. A zawna Serie A nomawi vawi kua chawi an tumna kawngah chet sual a thiang lo a, hnehna chan leh ngei pawh an tum ang. Sarri naute hian an league match hnuhnung berah Genoa 3-1 in an hneh, forward Ronaldo leh Dybala ten goal mawi an khung ve ve. Torino lakah pawh anni pahnih bawk hian enbik an hlawh leh dawn.

Italian manager Sarri chuan, "Ka naute tun hnaiah an khel ṭha rual hle, eng team pawh hmachhawn thei turin kan inpeih. Coppa Italia final-a kan chak loh khan kan rilru na takin a nghawng a, chu chuan rah ṭha a chhuah.

"A bik takin Ronaldo leh Dybala te kha an hmuhnawm, football mawina hi an pho chhuak ṭhin. Team ṭhenkhatah chuan player ṭha khel dun hleithei lo hi an awm fo, kan team-ah erawh inrem takin an khel thei," a ti. Pathianni zanah Inter Milan pawh Bologna khelmualah an lenglut dawn. Antonio Conte naute hi tun hnaiah an khel ṭha tluang leh tawh hle a, Italian manager-in a sawi lawk tawh angin beisei a bo hma chuan league nomawi an chuh ve ngar ngar ang.

Zanin Inkhel Tur

Juventus    08:45 PM    Torino

Sassuolo    11:00 PM    Lecce

Lazio    01:15 AM    AC Milan

Pathianni Inkhel Tur

Inter Milan    08:45 PM    Bologna

Cagliari    11:00 PM    Atalanta

Parma    11:00 PM    Fiorentina

Udinese    11:00 PM    Genoa

Brescia    11:00 PM    Hellas Verona

Sampdoria    11:00 PM    SPAL

Napoli    01:15 AM    AS Roma