Federer leh Djokovic an kal zel
US Open champion tura rinkai Roger Federer leh Novak Djokovic te chuan New York-ah ropuina chan tumin hma lam an pan zel a, nomawi chawi leh thei tura rinkai pahnih hian third round an in vaw kai.
Grand Slam vawi 20 champion tawh Federer hian Nick Kyrgios a hmachhawn leh dawn a, Australian tlangval hi chetsual theihna tur player a ni. Djokovic khingpui tur erawh a la chiang lo, Richard Gasquet leh Laslo Djere te inkhela a chak zawk nen an inhmachhawn ang.
A awlsam
Kum 37 tling tawh mah se court chhungah Federer a la tar lo. Nimin zing second round inkhelah Federer hian Benoit Paire chu 7-5, 6-4, 6-4 in a hneh, Swiss star hian hnehna chang turin darkar khat leh minute 56 bak a mamawh lo.
2004 leh 2008 inkar khan Federer-a'n US Open a thunun hneh hle, match 41 ngawt chak zawnin nomawi panga a chawi hman. Mahse, hun rei tak chhung final a thlen loh hnuah 2015 khan a thleng leh hlawl - amaherawhchu Djokovic a hneh lo a ni.
US Open vawi nga champion tawh Federer chuan, "Tennis-ah chuan set hmasa ber hi a pawimawh zual ṭhin, tun ṭumah khan a harsa deuh a, a hnuah erawh tihsual nei tam loin ka khel thei," tiin a sawi.
Federer-a hmachhawn tur Kyrgios hian inkhel inhnehtawk takah Pierre-Hugues Herbert chu 4-6, 7-6 (8-6), 6-3, 6-0 in a hneh ve bawk. World number 30 hi a tir lamah a khel ṭha tawk lo, set hmasa pahnihah chuan 6-4, 3-0 in a hnufual hman. Chak lo zawk tura ngaih a nih hnuah huaisen takin a lehthal leh hlauh.
Novak a tlang
Vawi hnih a champion tawhna hmunah Noval Djokovic-a'n khaw lum vangin inkhelh harsa ti deuh mah se, nimin zing khan khawtual tlangval Tennys Sandgren chu 6-1, 6-3, 6-7 (2-7), 6-2 in a hneh a, set hnuhnung ber la tur hian a khingpui service vawi hnih a chhuhsak.
Seeded parukna Djokovic leh Sandgren te hi July thla khan Wimbledon-ah an lo intawng tawh a, world number 61 Sandgren-a'n game ruk chauh a la. Tun ṭumah erawh nasa takin hma a sawn, Serbian tlangval nen an inchai tawk hle a, set a lak bakah a hloh ṭum pawhin awlsam takin a lak tir mai bik ngai lo.
A vawi 14 nan Grand Slam nomawi chawi tum Djokovic chuan, "Set hmasa pahnih ka khel ṭha em em a, a hnu lamah khan ka rilru a huaisen tawk lo deuh tih a lang. Rilru ka sawrbing tawk loh avangin ka lawm lo, chutih rualin set lina la tura ka khelh dan erawh lawmna tur a ni thung," tiin hnehna chang mah se duhthusamin a khelh loh thu a sawi.
Inkhel dang
US Open second round inkhel dangah seeded pasarihna Marin Cilic chuan Hubert Hurkacz lakah 6-2, 6-0, 6-0 in hnehna a chang, 2014 champion hian third round lut tur hian court chhungah darkar khat leh minute 19 chiah hun a hmang!
Senior player zinga Masters 1,000 title la thei Alexander Zverev pawh hma lam panin a kal zel, world number 4 hian Nicolas Mahut chu 6-4, 6-4, 6-2 in a hneh a, hard court inelna lianah hian a vawi khat nan third round a inhlang kai. German tlangval hi a champion thei a nih chuan a tan Grand Slam nomawi hmasa ber a ni ang.
Seeded kai phak zingah 14-na Fabio Fognini chu Australian player John Millman lakah 6-1, 4-6, 6-4, 6-1 in a chak lo a, Kei Nishikori erawh set hnih pawh an khelh zawh hmain a khingpui Gael Monfils chu a banrek dinglam na vangin a inkhel zui thei lo; Japanese player hian hah lutuk loin second round a paltlang theih phah a ni.