Europe-ah Modric a thiam ber

UEFA chuan season hman zawh taka Europe khawmualpuia player ṭha ber thlanna an tichhuak ta a, Real Madrid midfielder Luka Modric aia thiam an awm lo.

Modric hian he chawimawina dawng tur hian season hmasaa Real tana a khelhpui, Juventus forward ni ta Cristiano Ronaldo leh Liverpool forward Mohamed Salah te a khum a ni.

Kum 32 mi Modric hi Midfielder of the Year-ah thlan a ni bawk a, Salah chuan season duhawm tak hmang mah se kut ruakin UEFA Awards semna a ṭin san - Ronaldo chu Forward of the Year-ah thlan a ni.

Real captain Sergio Ramos hnenah Defender of the Year chawimawina pek a ni a, Keylor Navas chu Goalkeeper of the Year-ah thlan a ni bawk - Real-in UEFA Awards an thunun.

Kum ṭha

Modric-a'n Real tan Champions League nomawi a chawi hnuah Croatia chu Russia-a neih zawh tak World Cup-ah final a thlenpui a, player of the tournament chawimawina 'Golden Ball' hlan a ni bawk.

Croatian midfielder chuan, "Real nen Champions League nomawi kan chawi hnuah Croatia nen hun ropui tak kan tawng leh bawk a, tunah he chawimawina hi ka dawng leh a, ka tan chuan a ropui takzet a ni.

"Kumin hi ka tan chuan kum duhawm bik lawr lak a ni a, team leh mimal tak pawhin kum ṭha a ni. Ram tana ka khelh hnua ka mangphan ṭhin World Cup final hial ka khel a ni," tiin a hlim hle.

UEFA Awards sem zanah hian Manchester United leh England midfielder hlui David Beckham chu UEFA President's Award pek a ni bawk.

Hei le Navas

Keylor Navas chu Europe-a goalkeeper ṭha berah puan a ni a, nipui laia Real Madrid pantu Thibaut Courtois tan thu hriat nuam a ni hauh lo ang. Belgian keeper hian Real a pan hnuah goal a la veng miah lo a, Navas a nek chhuak zo lo!

Mi tam takin Raphael Varane dawn turah dah mah se Sergio Ramos chuan defender ṭha ber chawimawina a dawng a, Varane bakah hian Real tana a khelhpui tho Marcelo a khum.

England-a mimal chawimawina dawn theih zawng zawng dawngtu Salah tan Europe-ah hmun a awm lo a, Ronaldo chuan Salah leh Lionel Messi khumin forward

ṭha ber chawimawina a dawng.

Hmeichhe player thiam berah Pernille Harder thlan a ni a, Wolfsburg striker hian Lyon player pahnih Ada Hegerberg leh Amandine Henry te a khum a ni.

Chawimawina dawngtute
UEFA Men's Player of the Year Luka Modric, Real Madrid
Goalkeeper of the Year Keylor Navas, Real Madrid
Defender of the Year Sergio Ramos, Real Madrid
Midfielder of the Year Luka Modric, Real Madrid
Forward of the Year Cristiano Ronaldo, Real Madrid
UEFA Woman's Player of the Year Penille Harder (Wolfsburg)
Note: An club khelhna hming tarlan hi season liam taa an khelhna a ni.