Halep zuiin Wozniacki a tla

US Open khelh laiah seeded sang pahnih an tla ta. Ningani zan khan seeded pahnihna Caroline Wozniacki chu Lesia Tsurenko hneh loin a tla a, world number 1 Simona Halep chu hneh nei loin first round-ah a tla tawh bawk.

Denmark nula Woznia-cki hi world number 2 nilai a ni a, tun inelna lianah hian champion tura rinkai zinga mi a ni. Mahse, final vawi hnih a khelh tawhna hmunah hian beisei a phak lo; world number 36 lakah 6-4, 6-2 in a tlawm.

Kum 28 mi Wozniacki chuan, "Ka khelh dan tur ang zawkin a khel a ni," tiin a khingpui chu ani aiin a khel ṭhat zawk thu a sawi a, atan season chawhnu lam chu hun duhawm lo a nih thu a sawi tel bawk.

Inkhel dangah Grand Slam vawi nga champion tawh Maria Sharapova erawhin Sorana Cirstea chu 6-2, 7-5 in a hneh a, 2006 champion hian round sang zawk thlen zel a duh a nih chuan tihsual neih tlem a ngai - Romanian nula lakah hian double faults vawi 10 ngawt a nei.

US Open nomawi chawi tawh leh seeded palina ni bawk Angelique Kerber chuan Johanna Larsson lakah 6-2, 5-7, 6-4 in hnehna a chang a, season hmasa pahnihna Madison Keys, seeded pangana Petra Kvitova, Aryna Sabalenka, Aliaksandra Sasnovich leh Naomi Osaka te pawhin second round an paltlang ve bawk.