Champions League United leh Ronaldo an intawng leh dawn
Europe-a club inelna sang ber Champions League season thar a hnai leh ta a, Ningani zan khan group stage-a inhmachhawn turte tihchian niin Juventus forward Cristiano Ronaldo chuan amah siam liantu Manchester United a hmachhawn dawn.
European champion ni lai Real Madrid chu Group G-ah awmin season hmasa semifinalist AS Roma, CSKA Moscow leh Viktoria Plzen te nen an awmho a, last 16 chu harsatna nei loa lut mai tura ngaih an ni.
Season hmasaa final lut Liverpool tan final lut nawn tur chuan group stage aṭangin hna a hautak nghal dawn. Jurgen Klopp leh a naute hi French club ṭha Paris St-Germain leh Napoli te nen group khatah an awm.
Manchester City tan zinkawng a awlsam tura ngaih a ni a, Shakhtar Donetsk, Lyon leh Hoffenheim te nen an awmho dawn - an squad neihdan en chuan a awlsam hle tura ngaih a ni.
Hmangaih hmasa
Ronaldo zinkawng ngaihnawm sawi dawn chuan United hming lam tel loin a kalh a kim lo a, Portuguese forward pawh hian he club hi amah siam liantu a nih miau avangin a ngai hlu hle.
Tun season Champions League-ah erawh Ronaldo hna tur chu United hnawhchhuah a ni dawn a, hmangaih hmasa tih velin thinlungah hmun a chan a rem lo ang.
Season ṭan tir aṭanga talbuai nghal United tan tun hnaia Juventus record ngaihtuah tel chuan kawng a awlsam dawn lo tih a chiang a, Valencia hi ngaihthah mai atan chuan an lian hret bawk!
A harsa dawn
Liverpool-in season hmasa Champions League final an luh kha an tihfuh satliah a ni lo tih pholang tur chuan group stage an paltlang ngei a ṭul dawn a, Red Star Belgrade lakah chuan chak tura beisei ngam ni mah se PSG leh Napoli erawh a harsa ang.
PSG-in Kylian Mbappe, Neymar leh Edinson Cavani an neih avangin awlsam taka hneh theih an ni dawn lo tih a chiang a, Napoli-in season hmasa Champions League-ah result nei ṭha lo mah se an coach thar Carlo Ancelotti hi Champions League-a vawi thum champion tawh a ni a, tawh an khirh dawn.
Kum 59 mi manager hian, "PSG leh Liverpool hi champion thei khawpa team ṭha an ni a, an hriat tel atana ṭha erawh Napoli hmachhawn hi a nuam bik lo ang," tiin an khingpui tur team a vau lawk.
Barca hmaah Spurs
Barcelona-in season hmasaah La Liga nomawi chawi mah se an elpui ber Real-in season thum chhung a zawna Champions League nomawi an chawi avangin an lawm a kim lo a, Europe roreltu nih leh an duh.
Catalan club captain thar Lionel Messi-a'n season ṭan dawn khan Nou Camp khat tlat mipui hmaah, "La Liga leh Copa del Rey kan champion a, kan lawm hle. Mahse, Champions League hi Nou Camp-ah a kir a ngai leh tawh a ni," tiin a sawi a, mipui thawm a ring hle.
Mahse, Barca hi group stage-ah Tottenham Hotspur, PSV Eindhoven leh Inter Milan te nen an awmho dawn a, kalkawng a harsa nghal dawn.
Champion lai chu
Real-in Ronaldo chan tawh mah se Roma tih loh chu group stage-ah an tan khingpui harsa an awm dawn lo niin a lang a, Spanish club fan-te tan chuan an group awmna hi lawm avanga kut benna chi a ni.
Bayern tan pawh last 16 na na na chu awlsam taka luh theih niin a lang a, playoff hmanga inpetkai ṭhiau Benfica, Ajax leh AEK Athens te nen an awmho.
Atletico Madrid tan Borussia Dortmund chu hmachhawn harsa ber tura ngaih an ni a, Monaco leh Club Brugge hi tihfuh loh ṭum chuan hneh loh theih ve tho an ni bawk.
Group A
Atletico Madrid, Borussia Dortmund, Monaco, Club Brugge.
Group B
Barcelona, Tottenham, PSV Eindhoven, Inter Milan.
Group C
Paris St-Germain, Napoli, Liverpool, Red Star Belgrade.
Group D
Lokomotiv Moscow, Porto, Schalke, Galatasaray.
Group E
Bayern Munich, Benfica, Ajax, AEK Athens.
Group F
Manchester City, Shakhtar Donetsk, Lyon, Hoffenheim.
Group G
Real Madrid, Roma, CSKA Moscow, Viktoria Plzen.
Group H
Juventus, Manchester United, Valencia, Young Boys
Inkhelh hun
GROUP STAGE
September 18-19
October 2-3
October 23-24
November 6-7
November 27-28
December 11-12
KNOCKOUT ROUND
Round of 16 draw : 17 December, 2018
Round of 16
First leg : 12/13/19/20 February, 2019
Second leg : 5/6/12/13 March, 2019
Quarterfinal leh Semifinal draw : 15 March 2019
Quarterfinal
First leg : 9/10 April, 2019
Second leg : 16/17 April, 2019
Semifinal
First leg : 30 April/1 May, 2019
Second leg : 7/8 May, 2019
1 June: Final – Estadio Metropolitano, Madrid