Atalanta-in UCL an hnaih

Serie A season kal laia goal khung hnem ber Atalanta chuan an elpui Napoli 2-0 a hnehin an dinhmun an sawhnghet a, palina ni mekin season thara Champions League khel turin an dinhmun a ṭha leh tawh hle.

Ningani zan Atleti Azzurri d'Italia-a inkhelah mualneitu Atalanta tan Mario Pasalic leh Robin Gosens ten goal khat ve ve an khung a, mikhual team tun hnaia khel ṭha tluang takin a chhanletna an nei lo. Gian Piero Gasperini naute hi an league match hnuhnung pakuaah tlawm an nei lo, parukna Napoli aia an sanna chu point 12 a ni; an chesual viau a nih ngawt loh chuan tun season ang bawkin UCL an khel leh ngei dawn.

Gennaro Gattuso enkawl Napoli erawh tun hnaiah khel ṭha viau mah se Atalanta mualah an tlarhma a hriam lo a, nidanga an innghahna kulpui tlarhnung a phui tawk lo bawk - UCL ai chuan Europa League an beisei a ngai ang.