Heidenheim-in Bremen an chelh

Bundesliga khel tur zawnna playoff-ah Bundesliga 2-a pathumna Heidenheim chuan Werder Bremen chu an mual Weserstadion-ah an chelh a, 0-0 in an inhnehtawk. Bundesliga-a 16-na Bremen hian minute 87-naah captain Niklas Moisander chu yellow card vawi hnihna a hmuh avangin hnawhchhuah a ni a, second leg-ah a inlan thei dawn lo.

Second leg hi July 6, Thawhṭanni zan hian Voith Arena-ah khelh a ni dawn a, FC Heidenheim beisei tur a awm. Heidenheim hi kum 173-a upa an ni tawh a, Bundesliga erawh an la khel ngai lo. 2013–14 season khan 3. Liga-ah an champion a, a vawi khat nan 2. Bundesliga an khel. Season khelh zawh takah khan Heidenheim hi pathumnaah an awm a, playoff khel turin an tling.

Frank Schmidt-a kaihhruai Heidenheim-in Bundesliga khel turin minute 90 chhunga hnehna chan an mamawh dawn. Heidenheim khuaaah hian mipui 49,526 an awm a, Bayern Munich khelmual Allianz Arena velah chuan an vaiin an khung khawm vek theih. Werder Bremen an mikhualna tur Voith-Arena ah hian mipui 15,000 an leng a, Covid-19 hrileng hi awm ta lo chiah se chuan a khat hneh khawp ang.

Bundesliga khelh zawh tak aṭangin 17-na Fortuna Düsseldorf leh 18-na SC Paderborn te an relegate a, 2. Bundesliga champion Arminia Bielefeld leh pahnihna VfB Stuttgart ten season tharah club pahnih ai hi an rawn awh dawn a ni.