Keeper manto Alisson chesual mah se Chelsea iangin Liverpool an la chak vek

Liverpool-in fixture ṭihbaiawm an hmachhawn ṭan hma an match hnuhnung berah Leicester City chu King Power Stadium-ah 2-1 in an hneh a, champion rinkai zinga mi Chelsea-in AFC Bournemouth 2-0 in an hneh ve bawk. Reds leh Blues te hian league match vawi li khelh tawhah an la chak vek.

Chelsea khelh dan a lungawi thlak a, head coach Maurizio Sarri erawhin an khelh danah hmasawnna tur a la awm thu a sawi thung. Reds erawh khawvel keeper manto ber ni tura an lakluh Alisson a chetsual avangin an lawm a kim lo.

King Power Stadium lam...

Jurgen Klopp-a hnuaiah Liverpool an par leh ṭan a, tun hmaa club ropui tak hi German manager hnuaiah nomawi an la chawi loh avangin Reds chanchin hi sawi vul chuk a la rem lo.

Inrinni zan inkhelah Liverpool an hmuhnawm nghal a, an goal nawr na tak chu mualneitu Foxes tan dan an harsa. Roberto Firmino ball pet keeper Kasper Schmeichel dan per chu Mohamed Salah-a'n goal zawnah a khung thei lo.

Amaherawhchu, minute 10-na lekah Sadio Mane-a'n James Milner hnen aṭanga a ball hmuh chu chiang zetin a pet goal. Senegalese forward hian tun season league match liah goal hnih khungin assist vawi hnih a nei tawh bawk.

Reds game nung tak hi tlahniam deuh mah se first half tawp hmain Firmino chuan corner aṭanga ball kal chu a tauh lut a, 2-0 in first half a tawp.

Klopp-a naute tan point thum hlawh chhuak turin harsa tur awmin lang tawh lo mah se minute 63-naah Alisson a chesual. Brazilian keeper ball keng kual chu Kelechi Iheanacho-a'n nangching hmanin, Foxes tan Rachid Ghezzal-a'n a siphurh a sut ṭhen. Reds-in point thum an hlawh tho a, an hlawhchhuah dan erawh a harsat phah thung.

Salah leh Alisson?

Egyptian forward Salah chu minute 71-naah Xherdan Shaqiri-a'n a thlak a, khelmual chhunga chet dan aṭanga tehin Klopp-a thutlukna a pawm thlap a ṭul. Season liam taa goal 32 khung chunga Premier League top scorer Salah hian tun season-ah goal hnih a khung tawh a, chutihrualin 'one season wonder player' nih a duh loh chuan a chet ṭhat chhunzawm a ṭul ang.

Liverpool-in keeper Loris Karius chetsual vangin Champions League nomawi an chân tawh a, pound maktaduai 67 man keeper Alisson-a chesual hi hmuh a hrehawm dawn. Brazilian keeper hian Brighton an hmachhawn ṭumin risk a la tawh a, tunah erawh a chesual ta.

Alisson chuan, "Tihsual ngaia tihsual nawn ka tum lo. Inzirna tur ka nei a nih chuan ka inzir zel ang a, tihsual lai siam ṭhat tum loa luhlul tlat a ṭha lo. Ka ngaihdanah chuan foul a ni a, amaherawhchu Premier League-ah chuan insu hrim hrim hi foul a ni lo," tiin insiamṭhat a tum thu a sawi.

Stamford Bridge lam...

Europe transfer hun a tawp a, Chelsea-in Eden Hazard an chelh dawn tih a chiang tawh. Belgian forward hi Blues tan player hmuhnawm a ni a, Bournemouth-in an chelh lo.

Inrinni zan Stamford Bridge inkhelah first half-ah goal a lut lo a, second half-ah Maurizio Sarri-a'n substitute awmze nei siamin inkhel result a dang phah. Substitute pahnih Pedro leh Olivier Giroud ten wall pass hmangin Cherries tlarhnung an ṭhiat a, Barcelona winger hlui hian box pawn aṭangin minute 72-naah a khung.

Minute 85-naah khelmuala langsar ber Hazard chuan Marcos Alonso siam chu chiang zetin a hlap lut. Belgian forward hian goal a khung hma hian Spanish defender Alonso goal khung turin ṭha takin ṭum hnih a siam sak a, a khung thei lo ve ve.

Blues an mawi

Chelsea boss Maurizio Sarri chuan, "Match liah point 12 kan hmuh avangin ka lawm a, amaherawhchu hei aia ṭha hi ka la beisei a. Hmasawnna tur kan la nei a ni," tiin team siam ṭhat hna thawhchhoh zel a tum thu a sawi.

Season liam ta khan Cherries-in Stamford Bridge-ah 3-0 in hnehna an chang a, tun season-ah erawh result a dang. Eddie Howe chuan, "Tun season Chelsea hi nikum nen khan an khelh dan a dang daih a, khelh an harsa hle," tiin a khingpui team a fak.

Fixtures ṭihbaiawm

International break a awm dawn avangin kartawpah club inkhel a awm lo. Hemi zawh aṭang chiah hian Liverpool tan fixtures ṭihbaiawm a in ṭan dawn.

Reds hian Tottenham, French champion Paris St-Germain leh Southampton te an hmachhawn dawn. Chumi zawhah Chelsea nen league leh League Cup-ah vawi hnih an inkhel dawn a, Italian club ṭha Napoli leh Manchester City-in a chhunzawm ang.

September 1, Inrinni
Leicester City 1 - 2 Liverpool
Brighton & Hove 2 - 2 Fulham
Chelsea 2 - 0 AFC Bournemouth
Crystal Palace 0 - 2 Southampton
Everton 1 - 1 Huddersfield Town
West Ham United 0 - 1 Wolverhampton
Manchester City 2 - 1 Newcastle United
Team Dinhmun
# Team Pld W D L GF GA GD Pts
1 Liverpool 4 4 0 0 9 1 8 12
2 Chelsea 4 4 0 0 10 3 7 12
3 Manchester City 4 3 1 0 11 3 8 10
4 Tottenham Hotspur 3 3 0 0 8 2 6 9
5 Watford 3 3 0 0 7 2 5 9
6 AFC Bournemouth 4 2 1 1 6 5 1 7
7 Everton 4 1 3 0 7 6 1 6
8 Leicester City 4 2 0 2 6 5 1 6
9 Wolverhampton 4 1 2 1 4 5 -1 5
10 Southampton 4 1 1 2 4 4 0 4
11 Fulham 4 1 1 2 7 9 -2 4
12 Brighton & Hove 4 1 1 2 5 7 -2 4
13 Arsenal 3 1 0 2 5 6 -1 3
14 Manchester United 3 1 0 2 4 7 -3 3
15 Crystal Palace 4 1 0 3 3 6 -3 3
16 Cardiff City 3 0 2 1 0 2 -2 2
17 Huddersfield Town 4 0 2 2 2 10 -8 2
18 Newcastle United 4 0 1 3 3 6 -3 1
19 Burnley 3 0 1 2 3 7 -4 1
20 West Ham United 4 0 0 4 2 10 -8 0