Coimbatore ah Mizo rider an tlan chak

JK Tyre-FMSCI National Racing Championship 2018 round 2-ah Mizo hming a mawi leh ta a, Jerome Lalrengpuia chuan Rookie Cup inelna huangah a mah el phak tawng loin a champion.

Coimbatore a neih inelnaah hian Inrinni leh Pathianni khan round khatna leh hnihna tlan a ni. Inrinniah Jerome chu pakhatna a ni a, nimin lamah PC Andy Lalhmangaihsanga chu pakhatna a ni thung.

Rider pahnih hi pakhatna an nih loh tumin pahnihna an ni ve ve a, heivang hian point-ah an in ang. Tehna hrang hrang hman a nih hnuah qualifying lap time a ṭha zawk Jerome chu champion a puan a ni a, a lawmawm lai ber erawh Indian rider beiseiawm rual pungkhawm karah Mizo rawlthar pahnih inkara buk lung khai a ngai hi a ni.

Mizo rawltharin Coimbatore-ah amah aia tlan chak a tawn loh avangin Spain-ah Red Bull bultumin Rookie Cup-ah India ai a awh dawn.

Rookie Cup bakah hian Gixxer Cup-ah Mizo tlangval Malsawmdawngliana leh Anthony Lalawmpuia te an inlan bawk a, Gixxer Cup bik erawh la tlan zawh loh niin round thumna la tlan leh tur a ni a, Mizo tlangval tan hna a awlsam dawn lo - round khatnaah top three-ah rider pahnih lang lo mahse round hnihnaah erawh Malsawmdawngliana chu pathumna a ni. Hei hian beiseina a siamsak ang.

Sulhnu nei tha

National racing championship-ah Mizo rider ten sulhnu an nei tha a, kum 2013 khan Tlangnuam tlangval Lalrindika chu a lo champion tawh a, nikum khan Bawngkawn tlangval Israel Lalhruaizela chu a champion ve leh bawk.

National Racing Championship-ah hian kum 2010 khan MiMSA rider zinga a vawi khat nan Lalawmpuia chu a lo tel tawh a, podium erawh a lawn phak lo.

Red Bull Road To Rookies tia an koh, Rookies Cup tia hriatlar bikah hian Zothanmawia chu hmahruaitu ni mah se practice naah a inhliam avangin nimina round tawp ber intlansiakah hian a tel thei lo a, hetichung hian Mizo tlangvalten podium sang ber an lawn ta tho a ni.

Beisei phak lo

MiMSA in result duhawm tak an nei chungin president Vanlalmuana erawhin beisei an phak loh thu a sawi. Muantea chuan ,"Tun aia tha zawk hi result kan beisei a, Gixxer Cup-ah phei chuan hei aia ṭha zawk ti thei kan ni," a ti a, a naute an vanduai thu a sawi.

Jerome-a'n Rookie Cup-ah pakhatna dinhmun a luah a, lawmthu sawina tur a ngah hle. Lawngtlai rawlthar chuan,"MiMSA in nasa takin min buaipui a, ka lawm takazet. Lawngtlai Racing Team a kan general secretary B. Lalchhuanawma leh CYS Council lama kan hotute inpekna pawh sawi hmaih theih a ni lo," tiin lawmthu a sawi.

Jerome chuan sawi zawmin,"Round hnihnaah ka chet that hi a pawimawh tih ka hria a, mahse corner vawi khatnaah ka tluk nghal avangin ka hlauthawng hman. Theihtawp erawh ka chhuah chhunzawm a, ka vannei ta a ni," tiin Vanglaini a hrilh.

MiMSA Rider Feh chhuakte:
Rookie Cup
1 Jerome Vanlalrengpuia Lawngtlai
2 Andrew Zochhuanliana Chaltlang
3 Lalramthara Sailo Bawngkawn
4 Deepak Gharty Bawngkawn
5 Samuel Lalrinsanga Lawngtlai
6 PC Andy Lalhmangaihsanga Rulchawm
Gixxer Cup
1 Anthony Lalawmpuia Mission Vengthlang
2 Malsawmdawngliana Kanan Veng

JK Tyre-FMSCI National Racing Championship neihna hmunah hian Vanglaini reporter John Zothansanga chu a hmunah kalin report a pe a ni.