Kerber tlak lain Sharapova a la dam

US Open khelh mekah Angelique Kerber leh Petra Kvitova te chu Inrinni khan an chak lo a, seeded sang zual paruk zingah champion lai Sloane Stephens chiah a dam tawh. Ranking sang lo mah se Serena Williams leh Maria Sharapova te an la dam thung.

Wimbledon champion Kerber chu seeded 29-na Dominika Cibulkova lakah 3-6, 6-3, 6-3 in a chak lo a, German nula hi champion tura rinkai ni mah se third round a paltlang zo lo. Quarterfinal vawi hnih a khelh tawhna hmunah Kvitova pawh 7-5, 6-1 in Aryna Sabalenka lakah a tlawm.

World number 1 Simona Halep, Caroline Wozniacki leh Kerber an tlak takah chuan tun season Grand Slam hmasa pathuma champion player zingah US Open last 16 lut phak an awm lo a, kum khat chhungin player pali kutah major title a lut dawn tihna a ni.

Inkhel dangah Ma­ria Sharapova chuan season hmasa French Open champion Jelena Ostapenko chu 6-3, 6-2 in a hneh. Russian star hian 2006 khan New York-ah hian nomawi a chawi tawh a, kuminah hian a vawi hnih nan champion a tum.

American unau Serena Williams leh Venus Williams ten third round paltlang zawk nih an inchuh a, a naupang zawk Serena-i'n 6-1, 6-2 in hnehna a chang. Kum 36 mi Serena hian champion chungchang a la sawi duh lo a, a thil tum hmasa chu quarterfinal thlen phawt a nih thu a sawi bawk.