La Liga-ah Real chak, Atletico chak lo

Real Madrid-in Cristiano Ronaldo an neih loh hnuah goal khungtu lamah an buai phah lo a, Inrinni zan khan Santiago Bernabeu-ah Leganes chu 4-1 in an sawp. La Liga champion rinkai zinga mi Atletico Madrid erawh Celta Vigo khelmualah 2-0 in an tlawm.

Bale leh Benzema

Real Madrid-ah Ronaldo a langsar ber ṭhin a, Portugal captain hian club tana a khelhpui player langsar tak tak pawh a hliah khuh ṭhin. Tun season-ah erawh Manchester United forward hlui hian Juventus a pan a, Los Blancos an talbuai rih lo.

Julen Lopetegui hote hian an mualah bul an ṭan ṭha a, Gareth Bale chuan minute 17-naah a pet goal nghal. Welsh forward hian La Liga match thum an khelh tawhah goal a khung vek.

Leganes tan Guido Carrillo chuan penalty hmangin minute 24-naah sut a, first half-ah 1-1 in an tawp. Second half minute thumnaah Karim Benzema-a'n a tauh goal nghal a, he goal hi video assistant referee puihna zara pawm a ni.

French forward Benzema hian minute 61-naah a khung belh a, Sergio Ramos chuan penalty aṭangin Real goal lina chu minute 66-naah khungin 4-1 in hnehna an chang.

Real trio BBC zinga Cris­tiano Ronaldo awm tawh lo hi Bale leh Benzema ten an hlawkpui niin a lang. Season liam taa league-a goal nga lek khungtu Benzema hian tun season match thum lek aṭangin goal li a khung der tawh.

Gareth Bale erawhin season liam ta pawhin league-ah goal 16 a khung thei a, record chhia a ni lo. Chutihrualin Welsh forward hian Los Blancos tan season nga a khelh tawhah league-ah goal 20 a la khung tling lo a, tunah hian goal thum khung tawhin a dam ṭha a nih chuan a hun laia khawvel player manto ber hian sulhnu ṭha zawk a hnutchhhiah thei ang.

Atletico an chesual

Atletico Madrid-in Celta Vigo hmachhawn turin Balai­dos an tlawh a, an beisei ang result an hlawh chhuak lo. Celta tan Maxi Gomez leh Iago Aspas ten second half ṭantirhah an khung a, mualneitu goal thumna erawh video assistant referee hmanga pawm a ni lo.

Atletico defender Stefan Savic chu minute 20 a la awmin yellow card vawi hnihna a hmuh avangin hnawhchhuah a ni a, player 10-in an khel tluan.

Argentine manager Diego Simenone chuan, "Result vangin ka lunghnur lo. Kan khel ṭha lo a, Celta-in an chance neih an hmang ṭha bawk. Tuna kan result hi min bengharhtu atan kan hman a ṭul a, season tluana kan ṭhat phah theihna tur a nih avangin kan chak lo hi pawi ka ti lo," tiin insiamṭhat nan hman an tum thu a sawi.