Asian Games 2018 ; India-in medal a lak hnem ber ṭum a ni

Ram 45 inlanna Asian Games 2018 chu September 2, Pathianni khan a kharna hun hman a ni. India chuan medal 69 lain Asian Games neih a nih tawh china medal a dawn hnem ber ṭum a tawng a, gold medal lak tam lamah erawh 1951-a an record siam 15 nen a intluk.

Asian Games hi August 18 aṭang

khan Indonesia khawpui pahnih Jakarta leh Palembang-ah neih ṭan a ni a, nitin zing dar 7:00 aṭanga zan thleng neih ṭhin a ni a, a pumpuiah China an champion. China hian gold chauh pawh 132 zet an la a, silver (92) leh bronze (65) nen a vaiin medal 289 zet an dawng.

Asia khawmualpui ram 45 inlan zingah ram 37-in medal an dawng phak a, heng zinga ram 28 ten gold an la. Gold 15 latu India hian a chetṭhat ṭum tawng mah se, pakhatna dinhmun luahtu China a phak lo hle - a elpui ram lian ai hian medal 220 ngawtin a dawng tlem zawk a ni.

Inelna hmachhawn turin India infiammi 572 zet a kal chhuak a, infiamna bung hrang 36-ah an tel. A hawnna hun an neih ang bawkin kharna hunah ram tin player ten kawng an zawh leh, mahni ram lama haw an tam tawh avangin an kim lo tawh hle thung; closing ceremony-ah hian hmeichhe hockey team captain Rani Rampal chu hnam puanzar kengtu (flag bearer) a ni. A hawnna neih a nih ṭum khan fei khawh thiam (Javelin thrower) Neeraj Chopra chuan hnam puan zar a lo keng tawh bawk.

Boxing-ah Gold

Inrinni khan India chuan medal pahnih a dawn belh a, chung zinga pakhat zawk chu boxing huangah niin; Amit Panghal (49kg) chuan Olympic leh Asian champion ni kawp lai Uzbekistan boxer Hasanboy Dusmatov hnehin gold a hnek chhuak.

Kum 22 mi Dusmatov hi sipai a ni a, tun Asian Games-ah hian Indian boxer zinga gold la thei awmchhun niin, infiamna khawmpui lian neih a nih tawh chinah gold la thei pariatna chiah a ni bawk.

Nikum khan boxer pahnihte hi World Championship final-ah an lo inhmachhawn tawh a, India tlangval hi a chak lo zawkah a ṭang. Tunah erawh thawnthu a danglam ta, Amit chuan, "Ka hneh loh hnu a ni a, phuba lak kha ka tum a ni. Coach Santiago Nieva leh a thawhpui ten min ṭanpui ṭha hle a, semifinal aia ṭha zawkin final ka khelh theih vanga champion ka ni," a ti.

India mipa zingah gold hnek chhuak thei an awm nual tawh laiin, hmeichhe lamah erawh 2014 Games khan gold medal kan hmu chiah. MC Mary Kom chuan India nulate tih theih ngai loh rawn tiin pakhatna a ni a, tun thlengin Manipuri boxer hnung zui thei an la awm chuang lo.

Hockey

India hockey team ten champion nih tum ngamin Asian Games an khel a, mahse an tum ram an thleng lo. Zirtawpni zan khan hmeichhe team-in silver an la a, Inrinni khan mipa in bronze an vaw chhuak ve leh thung. Pathumna nih inchuhnaah India hian a ṭhenawm leh hmelma ni bawk Pakistan chu 2-1 in an hneh.

Hockey mipa final-ah Japan chuan Malaysia an hneh thung, ram pahnihte hun pangngaiah 6-6 in an inhnehtawk hnuah, penalty shootout hmangin chak zawk zawn a ni a, Japan lamin 3-1 in hnehna an chang. Asian Games champion hi 2020 Summer Olympic atan an tling nghal.

Asian Games-ah hian Mizo nula Lalremsiami Hmar chu hockey huangah a inlan a, Siami hian India champion pui chiah lo mah se silver a lak hi Mizoram tan mellung pawimawh a ni. Mizo infiammi zingah Asian Games-a medal la thei hmasa ber niin, tunah hian Youth Olympic khel turin a inbuatsaih zui leh dawn bawk.

Asian Games 2018 Medal Table
# Ram Gold Silver Bronze Total
1 China 132 92 65 289
2 Japan 74 56 74 204
3 South Korea 49 58 70 177
4 Indonesia 31 24 43 98
5 Uzbekistan 21 24 25 70
6 Iran 20 20 22 62
7 Chinese Taipei 17 19 31 67
8 India 15 24 30 69
9 Kazakhstan 15 17 44 76
10 North Korea 12 12 13 37
11 Bahrain 12 7 7 26
12 Thailand 11 16 46 73
13 Hong Kong 8 18 20 46
14 Malaysia 7 13 16 36
15 Qatar 6 4 3 13
16 Mongolia 5 9 11 25
17 Vietnam 4 16 18 38
18 Singapore 4 4 14 22
19 Philippines 4 2 15 21
20 UAE 3 6 5 14
21 Kuwait 3 1 2 6
22 Kyrgyzstan 2 6 12 20
23 Jordan 2 1 9 12
24 Cambodia 2 0 1 3
25 Saudi Arabia 1 2 3 6
26 Macau 1 2 2 5
27 Iraq 1 2 0 3
28 Lebanon 1 1 2 4
28 Unified Korea 1 1 2 4
30 Tajikistan 0 4 3 7
31 Laos 0 2 3 5
32 Turkmenistan 0 1 2 3
33 Nepal 0 1 0 1
34 Pakistan 0 0 4 4
35 Afghanistan 0 0 2 2
35 Myanmar 0 0 2 2
37 Syria 0 0 1 1