Son-a'n sipai ṭan a pumpelh

South Korea-in Asian Games football final-ah Japan chu extra time-ah 2-1 in an hneh a, an champion. Tottenham forward Son Heung-min chuan an ram chu gold medal a laksak avangin sipaia ṭan a pumpelh ang.

Inrinni khan Pakansari Stadium, Cibinong-ah gold medal inchuhna hi neih a ni a, hun pangngaiah goal a lut lo. Extra time-ah South Korea-in Lee Seung-woo (93') leh Hwang Hee-chan (101') hmangin goal an khung a, Japan tana minute 115-naa Ayase Ueda khung chu scoreline lan mawina chauh a ni tawh.

Spurs lawmna

Tottenham chuan July thla khan Son chu kum nga chhung atan a contract an pawhsei sak. Amaherawhchu, South Korea danah chuan kum 28 tlin hmain an ram sipaiah thla 21 chhung hun an hman a ṭul.

Spurs forward Son-a tan a contract thar hi hman zawh loh theih a ni a, kum 26 a nih tawh avangin tun ṭum Asian Games-a gold medal lak chu a pumpelh theihna kawng awmchhun a ni.

Asian Games-a football inelna hi kum 23 hnuai lam inelna a ni a, senior player pathum tel theih a ni. Spurs forward hi Son hi kum upa pathum zinga mi a ni a, captain a ni tel bawk.

Kum 2014 khan South Korea hian final-ah North Korea hnehin gold medal an dawng tawh a, amaherawhchu khatih hunlaia a khelhna Bayer Leverkusen-in a tel an remtih sak loh avangin a tel lo.

Spurs erawhin an player duhlai hi mamawh mah se hmalam hun thlirin Son chhuah an phal a, gold medal a awrh takah chuan London club tana a contract hi harsatna nei loin a hmang zo thei ang.

5 star S. Korea

Asian Games-ah South Korea hi vawi nga an champion tawh a, champion ngun ber niin anmahni hnaih bertu Iran vawi li an champion.

India mipa football team pawhin kum 1951 leh 1962 khan gold medal an dawng tawh a, Myanmar leh Chinese Taipei nen vawi hnih ṭheuh an champion tawh bawk.

South Korea Zinkawng
GROUP STAGE
South Korea 6-0 Bahrain
Malaysia 2-1 South Korea
South Korea 1-0 Kyrgyzstan
LAST 16
Iran 0-2 South Korea
QUARTERFINAL
Uzbekistan 3-4 (a.e.t) South Korea
SEMIFINAL
Vietnam 1-3 South Korea
FINAL
South Korea 2-1 (a.e.t) Japan