Set hloh loin Federer-a'n last 16 lut

Flushing Meadows, New York-ah Roger Federer-a'n tennis khel thiam chungchuang bik a nih zia lantir chhunzawm mek zel a, Swiss star hian Inrinni zan khan Nick Kyrgios chu straight set a hnehin US Open last 16 a inhlangkai.

Champion tura rinkai Rafel Nadal leh Novak Djokovic te pawhin harsa lutuk loin third round an paltlang a, hetih lai hian seeded palina ni phak Alexander Zverev erawh a chak lo. German tlangval hian tun hma ang bawkin US-ah result ṭha nei thei lo chhunzawm.

Federer a tlo

Kum 37 mi a ni tawh a, a rualpui player ten tennis an chawlhsan zo deuh vek tawh. Hetih lai hian Federer erawh chawl mai loin player hlauhawm berte zinga mi a la ni phak.

Vawi nga a champion tawhna hmunah Federer a mikhual lo a, set hmasa berah erawh a buai ve hle. Australian tlangval Kyrgios lakah break point vawi li ngawt a inchhanhim hram; 5-4 a nih hnuah a khingpui service a chhuhsak thei hlauh.

Nungchang ṭha lo vanga buaina nei zauh zauh Kyrgios-a'n match dang ang bawkin dawhtheihna a tlachham a, fimkhur loh vangin tihsual a ngah - darkar khat leh minute 44 chhungin Federer-a'n 6-4, 6-1, 7-5 in hnehna a chang.

Grand Slam vawi 20 champion tawh Federer hian, last 16-ah chuan Kyrgios-a hnam pui pa John Millman a hmachhawn leh dawn. New York-ah hian 2008 hnua a vawi khat nan champion leh a tum dawn a ni.

Beisei a awm

Roger Federer-a'n a kum a tam tawh avangin tournament zawng zawng a khel kim tawh ngai lo, season hmasa ang bawkin clay court-ah a inlan lo. Mahse, a beisei Wimbledon-ah erawh quarterfinal a paltlang thei chuang lo.

Chawlh a neih leh hnuah hard court season a hmang a, 2016 khan a inlan lo tih mai loh chu US Open-ah hian a zawnin season 17 chu last 16 a lut ta. Kuminah hian set hloh miah loin a la kaltluang a ni.

Grand Slam-ah hian chawlhkar hnih chhung inkhelh ṭhin a ni a, hun chanve hma lama set hloh loh hi player tin te duhthusam a ni - hei hi Federer-a'n a la ti thei, a thlen chin tur chiang lo mah se beisei erawh a la neih san phah hle.

US Open vawi nga champion tawh Federer chuan, "Kyrgios khan ball a vaw na hle, a bik takin a service kha ka tan a harsa. Mahse, backhand hmanga ball ka pek kha atan a harsa ve thung. Last 16 ka thleng thei hi ka lawm a, hriselna ṭha ka nei hi ka vannei hle," a ti.

Nadal leh Djokovic

World number 1 Rafael Nadal-a'n Zirtawpni zan khan service nei ṭha tak mai Karen Khachanov chu 5-7, 7-5, 7-6 (9-7), 7-6 (7-3) in a hneh a, a khingpui hian vawi 22 ngawt aces a siam laiin Nadal erawhin a siam lo thung. Spanish player hian nizan khan Nikoloz Basilashvili a hmachhawn leh a, result kan hre hman lo.

Inrinni zanah Novak Djokovic a inlan zui ve thung a, Serbian tlangval hian Richard Gasquet chu 6-2, 6-3, 6-3 in a hneh. Grand Slam vawi 13 champion tawh hian hnehna a chan hnuah tun season chhunga a khelh ṭhat ber ṭum a nih thu a sawi hial.

World number 1 hlui Djokovic chuan, "Wimbledon khelh hnuah hard court season kan hmang a, tun ṭuma ka match kha ka khelh ṭhat ber ṭum a ni hial awm e. Ka khingpui kha khawvela backhand nei ṭha berte zinga mi a ni a, chutih rualin harsa lutuk loin ka tlang thei," a ti.

Zverev a tla

Player langsar Federer, Nadal leh Djokovic te elphak tura ngaih Alexander Zverev hi inelna lian lo zawkah che ṭha ṭhin viau mah se, inelna ngaihhlut Grand Slam-ah erawh a ruh ala no deuh a, beisei a phak lo ziah.

Kum 21 mi Zverev-a'n Philipp Kohlschreiber lakah vawi 52 zet unforced errors a nei a, seeded palina niin rinkai zingah tel mah se 6-7 (1-7), 6-4, 6-1, 6-3 in a chak lo zawkah a ṭang a, break point vawi 13 a hmuh zinga vawi thum chiah a hman ṭangkai theih avangin round sang zawk luhna kawng a inhawng lo.

Inkhel dangah John Millman chuan Mikhail Kukushkin laka 6-4, 4-6, 6-1, 6-3 a hnehna changin a vawi khat nan Grand Slam last 16 a lut a, quarterfinal thleng tur erawhin thil mak a thlentir a ngai dawn; a hmaah Federer a ding dawn a ni.

Player langsar lo Joao Sousa chuan seeded 17-na Lucas Pouille chu 7-6 (7-5), 4-6, 7-6 (7-4), 7-6 (7-5) in a hneh ve bawk, world number 68 hian Wimbledon champion Novak Djokovic a hmachhawn ve leh thung ang.

Inkhel Thlirna Tawi
Kyrgios Stats Federer
13 Aces 16
2 Double Faults 1
57/94 (61%) First Serve % In 61/92 (66%)
36/57 (63%) Win % On 1st Serve 53/61 (87%)
22/37 (59%) Win % On 2nd Serve 15/31 (48%)
14/30 (47%) Net Points Won 21/25 (84%)
0/4 (0%) Break Points Won 4/10 (40%)
24/92 (26%) Receiving Points Won 36/94 (38%)
32 Winners 51
35 Unforced Errors 24
82 Total Poinys Won 104