Ronaldo-a'n a nghah rih a la ngai

Juventus chuan Serie A season chu duhthusamin bul an ṭan ṭha, match thum an khelh tawhah hnehna an chang vek. Cristiano Ronaldo tan erawh lunglawm a la kim thei lo, Real Madrid forward hian a league goal hmasa ber khung tur chuan match dang a nghah a la ngai dawn.

Inrinni zan khan Italian champion chu Serie A kai thar Parma khelmualah an lenglut a, minute hnihna lekah Mario Mandzukic-a goal khung chu chawlhlawk hmain Parma lamin Gervinho hmangin an sut a, chakna goal hi Blaise Matuidi-a'n minute 58-naa a khung a ni.

Manchester United leh Real Madrid tana goal a khung theih zia lantir tawhtu Ronaldo a la vannei thei lo tluang zel, Portugal captain hian half time hma hretin hnai tak aṭangin khung theihna hun a nei. Mahse, Parma goal hrulah a tauh chhuak a, tun season chhungin chance vawi 23 a neih tawh a la hlah vek!

Zirtawpni zan khan Juventus elpui tura ngaih pahnih AC Milan leh AS Roma an inhmachhawn a, San Siro-a inkhelah Gennaro Gattuso nauten 2-1 in hnehna an chang a, match hnih an khelh hnuah point thum an hlawh chhuak ve ta.

Milan hian an match hmasa zawk an khelh ṭumin Napoli lakah si hnih faia hma an hruai hnuin an tlawm a, tun ṭumah erawh an chesual nawn tawh lo. Milan tan Kessie leh Federico Fazio ten goal an khung a, Napoli nena an inkhelh ṭum ang thoin goal hnih bawkin hma an hruai. Hun tawp dawnah Roma forward Patrick Cutrone-a'n an siphurh sut ṭhen mah se goal dang chhuah belh tawh loin hnehna an chang.