Stephens hnehtu Raducanu a tlang
Emma Raducanu chuan mipui beisei ang ngeiin inkhel hmuhnawm a chhawp chhuak. Britain star hian Australian Open a match hmasa berah Sloane Stephens chu 6-0, 2-6, 6-1 a hnehin second round a inhlangkai.
Melbourne Park-ah Raducanu hi a inlan vawi khatna a ni, mahse a mikhual lo hle. Amah ang bawka US Open champion ni tawh Stephens lakah hian set hmasa berah phei chuan game a hloh miah lo, set hnihna hloh ve mah se a tawpah a chungnung zawk a ni ta tho.
Kum 19 mi Raducanu hi seeded 17-na pek a ni a, a match lehpekah chuan Danka Kovinic a hmachhawn leh ang. Kovinic hian a khingpui Jang Su-jeong chu 6-3, 2-6, 6-4 in a lo hneh ve bawk a ni.
US Open champion lai Raducanu chuan, "Kei leh Sloane khan theihtawp kan chhuah tak meuh a, inkhel awlsam lo tak a ni. Point ṭhenkhat hlawh chhuak tur phei kha chuan thawhrim a ngai thei hle," tiin a sawi a, khelh hmabakah beisei a neih thu a sawi bawk.
New York khawpuia inelna an neih ṭum khan Raducanu hian khawvel a barakhaih a, tun ṭumah hian mipui mit fukna a ni tawh. Grand Slam bikah a chet ṭhatna hi chhawmnun a tum dawn a, a thleng sang a nih pawhin thil mak chu a ni tawh lo ang.
Nimin khan inelna neih chhunzawm niin, world number 1 Ashleigh Barty chuan harsatna nei loin second round-ah hnehna a chang. Australian star hian Lucia Bronzetti chu 6-1, 6-1 in a sawp a, match hnih a khelh tawh chinah set a la hloh miah lo.
Kum 1978 hnu lamah Australian Open-ah hian tualchhung nula champion an la awm leh ngai lo. Kuminah hian Barty hian an ram record chhe tak hi thaibo a tum dawn a, nomawi a chawi thei a nih ngat chuan an ram tana a hlutna a zual khawp ang.
Grand Slam vawi hnih champion tawh Barty chuan, "Major tournament hi kar hnih khelh ṭhin a ni a, chuvangin match hmasa lama hun hman tam loh hi a pawimawh," a ti. Bronzetti hneh tur hian minute 52 chauh a hmang hial a ni.
Third round-ah Barty hian Camila Giorgi a hmachhawn leh ang. Seeded 30-na Giorgi hian Terez Martincova chu 6-2, 7-6 (7-2) in a lo hneh ve thung, seeded chang phak a nih bakah tawnhriat a neih tawh avangin Barty tan fimkhur a ngai dawn.
Giorgi chungchang zawhna chhangtin Barty chuan, "Ball vuak thiam leh vaw na tak a ni a, inelna hmachhawm tura kal khawm zingah rilru paukhauh leh ṭha a ni," tiin a khingpui tur a dahsang thiam hle.
Inkhel Thlirna Tawi
Stephens Stats Raducanu
0 Aces 0
1 Double faults 6
38/56 1st serve in 56/82
18/38 Win 1st serve 37/56
8/18 Win 2nd serve 12/26
3/8 Break points won 6/8
11/20 Net points won 7/9
14 Winners 15
42 Unforced errors 30
59 Total points won 79