Juventus hnehin Napoli an champion

Napoli chuan Cristiano Ronaldo awmna Juventus chu penalty shootout-ah 4-2 a hnehin Coppa Italia nomawi an chawi. Gennaro Gattuso-a'n manager puitling a nih hnua a champion hmasak ber ṭum a tawng.

Nilaini zan khan Stadio Olimpico, Rome-ah team pahnih hi a hmuna entu awm lo in an inkhel, hun pangngaiah goal awm loin an inhnehtawk. Juve tan penalty chhuih hmasa pahnih Paulo Dybala leh Danilo ten an hlah; Napoli tan Arkadiusz Milik chuan chakna goal a khung.

Coppa Italia-ah Napoli hi an vawi ruk champion-na chiah a ni a, kum 2014 hnua hlawhtlinna an chan lehna hmasa ber a ni. Turin club nen bik hian 2012 final khan inhmachhawnin Edinson Cavani leh Marek Hamsik te goal hmangin hnehna an lo chang tawh bawk.

Tun kar tawp aṭang hian Serie A khelh chhunzawm nghal a ni dawn a, league lama parukna nilai Napoli hian June 23, Thawhlehni zan dar 11:00 hian Verona an lenchilh chhunzawm dawn.

Gennaro Gattuso-a'n an chakna hnar pawimawh tlarhnung a rem phui leh a, defender rinrawl Kalidou Koulibaly hoa ding ten minute 90 chhung chu Juve hmatawng an dangchat thei. Kumin Coppa Italia-ah hian goal khat bak an chhuah lo hial.

Tlarhnung an ngaih pawimawh avangin Napoli goal nawr a na tawk lo, forward Lorenzo Insigne-a'n free kick chhuih ṭha viau mah se Gianluigi Buffon a paltlang zo lo a, kum 42 mi keeper hian hnai tak aṭanga Diego Demme khung tur a dang hman bawk.

Hrem vangin David Ospina chhawr thei lo mah se a aiawha lut keeper Alex Meret-a'n Dybala penalty chhuih a dansak a, Danilo chuan bar chungah chhuih chhuakin - Tunrin club tan hian Leonardo Bonucci leh Aaron Ramsey ten an khung.

Penalty chhuihah chuan Napoli lam an inringtawk hle; Insigne, Matteo Politano, Maksimovic leh Milik ten an chhuih lut vek a, chakna goal khung theihna tura indahṭha Old Lady forward Ronaldo chuan a chhuih ve hman lo.

Italian midfielder rorum ni ṭhin Gattuso hian player a nih laiin World Cup, Champions League leh Serie A nomawi a chawi vek a, team enkawl hna a thawh hnuah pawh rei vak lo hnuah hlawhtlinna in a umzui nghal.

Kum 2017 khan a club hlui AC Milan a enkawl a, Coppa Italia final lut mah se Juventus lakah 4-0 ngawtin an tlawm. Milan nen an inṭhen a, nikum aṭang khan Carlo Ancelotti hmun ruak luahin Napoli a enkawl - tunah chuan hmana a ngam loh kha hnehin nomawi a chawi ta.

Gattuso chuan, "Inpekna, zahawmna leh tihtakzetna hmuh ka duh avangin inkhelh lai khan ka thin a rim hial. Theihna zawng zawng kan hlan a nih chuan mal min sawm theitu football pathian hi chu a awm a ni. Theihtawp chhuahte chuan zahawmna dawn an phu," a ti.

Maurizio Sarri chuan Juve a enkawl hnua a nomawi dawn theih hmasa ber chu a thlauh keh phawt. Italian manager hian Serie A leh Champions League hmabak a la nei a, inelna pahniha champion tur pawh hian a awlsam dawn lo.

Chelsea tana Europa League champion tawh Sarri chuan, "Club, player leh fans tan kan chak loh hi a pawi, mahse kha bak kha tih theih kan nei lo. A khaikhawm nan chuan kan hriam tawk lo em a ni," tiin an chak loh chu na ti tak chunga an pawm thu a sawi.

Juventus hian Serie A-ah Lazio lakah point khatin hma an hruai mek a, a zawna a vawi kua nan champion an la beisei - Pathianni zan hian league match khel turin Bologna an lenchilh zui nghal dawn, insiamṭhat nghal a pawimawh ang.